U-Mongameli Emmerson Mnangagwa uthi ibandla lakhe ele ZANU PF selilungiselela ukhetho lwama By-Elections oluzakwenziwa mhlaka 9 Mpalakazi olokuvotela abazathatha izikhundla zedale lephalamende lapho okwaxotshiswa khona amalunga aweCCC ngozithi ungunobhala jikelele walo, uMnu. Sengezo Tshabangu.
Lokhu kuphume emhlanganweni omkhulu owedale laphezulu eleZanu PF, elePolitburo lapho uMongameli Mnangagwa akhuthaze khona uzulu we Zimbabwe ukuba aqhubeke evotela ibandla lakhe. Uthe ukhetho lwama By-elections luzaveza ukuba ibandla lakhe lithandwa nguzulu esithi lizanqoba okulesisindo.
"Ukhetho lwama by elections siyalungisela. Kumele sibone ukuba silungiselela ukuze sinqobe kukhetho olulandelayo endaweni zonke "
Ubonge uzulu wase Makoni ngokuvotela ibandla le ZANU PF kukhetho lwama By- elections lapho okunqobe ukhansila weZANU PF.
Kodwa umsekeli wesikhulumeli sebandla eliphikisayo eleCitizens Coalition for Change (CCC) uMnu Gift Ostallos Siziba uthi ukhetho lukamhlaka 9 alukho emthwethweni.
"Ukhetho lwama by elctions akumelanga lwenziwe ngoba usomlomo wephalamende wabala incwadi evela emuntwini ongazakaliyo. Ibandla elathuma abantu labantu ephalamende yilo ukumele lixotshe abantu "
Ingcitshi kwezombusazwe esebenza lebandla le People’s Unity Party (PUP) uMnu Herbert Chamuka uthi kusobala ukuba iZANU PF izimisele ukunqoba kukhetho lolu kungakhathelekile ukuthi luqhutshwa phansi kwesimo esidida ingqondo.
"Udubo olukhona yikuba uMnangagwa uyakwazi ukuba uzanqoba. Ibandla le ZANU PF livele selizimisele ukunqoba kukhetho "
UMnangagwa uqhubeke echasisa ngomhlangano omkhulu webandla lakhe ozakwenziwa mhlaka 27 Mfumfu eGweru. Ethi umhlangano lo uzazama ngazo zonke indlela ukudinga amacebo okulungisisa inhlupho ezibhekane lozulu we Zimbabwe.
Udaba lokungahlaliseki komumo wezombusazwe kwele Zimbabwe lukhangelelwe ukuhlaziywa kabanzi emhlanganweni omkhulu womanyano wamazwe angezansi yezwekazi ye Africa, oweSADC, obumele wenziwe kusasa kodwa ucine udliliselwa phambili.
Your browser doesn’t support HTML5
Udaba lomhlangano wePolitburo yeZanu PF siluphiwa nguMlondolozi Ndlovu