Abekhansili yemaphandleni eye Hwange Rural District babika ukuba sebelolonge umthetho ozabasiza ukubuthanisa imali yokuqhuba inhlelo zentuthuko emangweni lo, ngokuhlawulisa abamabhizimusi lezakhamizi imithelo.
Umthetho lo ubikwa ususezandleni zohlangothi lukahulumende olwe Local Government and Public Works bona abasawuhlolisisa anduba upasiswe.
Okumqoka ngalumthetho, ozalawula amaward angamatshumi amabili lasithupha-26, yikubamba ngamandla izakhamizi zemaphandleini eHwange ukuba zikhokhe umthelo wamadola amahlanu eMelika ngomnyaka, emuntwini ngamunye ngemva kokunanzelela ukuba imizi eminengi sekuyiminyaka ingakhokhi limfanelo.
Hwange Rural District Council tax meeting
UMnumzana Sikhumbuzo Moyo isiphathamandla esibona ngezemali kulikhansili uthi bakubone kuqakathekile ukubuthanisa izakhamizi ukuze bazichasisele ngalumthetho.
“Ngomthetho kufanele ukuthi wonke umuntu o-over 18 abhadale iUS$5, kodwa abadala bayakhala, yikho sesilehlisele sathi asiqaliseni ngomuzi.”
UNkosikazi Juniour Neluswi obona ngokubuthaniswa kwezimali lezi, uveze ukuba ezinye iziqinti kazilahlupho lokukhokha limithelo, esithi kuqakathekile ukuthi ikhansili ithole imali yokuqhuba inhlelo lokusebenzela kuhle izakhamizi. Wapha umzekeliso, wokuthi ngabe bebelandela umthetho wokuhlawula imithelo ngabe umhlangano wanamhlanje ubuzabe uqhutshelwa esakhiweni, hatshi ngaphansi kwesihlahla.
“Nxa siyi 2 500 sikhiphe sonke imali le siyathole US$12 500, nxa sesilayo, ikhansili ilethe izitina, iriversand ibhadale abantu abakhayo, kambe singehluleka ukuba le Hall. Ngakho siyakhuthaza badala ukuthi asikhepheni, amanye ama ama ward enza izimanga ngemali zonalezi zomthelo wekhanda.”
Hwange Rural District Council
Kodwa izakhamizi zamukele leli nyathelo ngokukhnona okukhulu zisithi lumthelo uphezulu kakhulu njalo aziyenelisi nxa kukhangelwa isimo sendlala esiseqintini lokusweleka kwamathuba emisebenzi yezandla engaziphathisa.
UNkosikazi Mirriam Ncube ongaphansi kweNduna uMvuthu, uchasisa esakhe isizatho esenza engenelisi ukuhlaula lumthelo.
“Mina ngiyaluka amacansi, ngiyalima engadini kodwa ngiyaswela lapha engithengisela khona.”
Lokhu kugcizelelwe ngumakhelwane wakhe, uNkosikazi Ntombiyezwe Moyo othi ukuswela imali yikho okubenza babonakale angani abafuni ukulandela imithetho yesiqinti.
“Umumo wakhona, imali vele kayikho yikho kuthiwa siyaswela. Akusikho ukuthi siyangafisi kodwa ngenxa yokuswela, imali yakhona uyabe ungelayo. Kathesi ungakhangela ungaze uyithole leyo $5 sugijimele kudleni ngoba akulalutho.”
Imithelo le ihlawulwa kubosabhuku, ibisidluliselwa enduneni, isiyafika kukhansili. Kodwa usobhuku weKachechete, uMnumzana Victor Ndlovu uthi lakibo kayifiki ngesimo sobunzima bempilo.
“Indlala, kasilamali, yiyo impendulo yakuqala bethi siyezwa sibili bengatshonjalo usebhuku kasalaenye indlela yokudlula.
UMnumzana Joshua Ncube ophethe ibhuku le BH36A, uthi phezu kwenswelo, abanye bekeliswa yikungaboni izithelo zalinhlanyelo.
“Yonimali yonale yinto engatholakaliyo, kodwa uzwe sekuthiwa ukuze sikwenzelen kumele kuphume kuwe kuyaphumani. Abanye bengabe belakho, kuyatshiyana kodwa bakhangela ukuthi bengaze befake engxenye kakubuyi futhi ngendlela okukhulunya ngayo lapha.”
Ngokutsho kwekhansili yeHwange, eminye njalo imithetho esikhwezwe kugatsha lwentuthuko yezabelo ngeyokukhuthaza abamankampani akumsebenzi wokwemba esiqintini lesi ukuba lawo akhiphe imithelo ezaphathisa enhlweni zentuthuko.
Eminye njalo izakhangela ngokulondolozwa kwezemvelo, ukujeziswa kwalabo abephula limithetho, ezalawula ukuhamba kwezimotha labatshayeli, ikakhulu abamagonyethi abavame ukupaka loba ngaphi komango.
Imithetho le, ikhangelwe ukuqala ukusebenza ekuqaleni komnyaka ozayo.
Your browser doesn’t support HTML5
Udaba lwabeHwange Rural Council lokuhlaulisa imithelo siluphiwa nguNokuthaba Dlamini