Abameli bamabandla eZimbabwe atshiyeneyo kwele South Africa bathi kayikho into ezaqeda ingxabangxoza yezombusazwe ebhekane lelizwe labo khathesi ngaphandle kokuqhutshwa kuphela kokhetho oluzaphuma lohulumende okhethwe nguzulu mngceke kungelansolo.
Lokhu kuphume kungxoxompikiswano eqoqwe yinhlanganiso eyeAfrican Diaspora Forum, eJohannesburg, kwele South Africa. Abameli bamabandla atshiyeneyo bathe kusobala ukuthi uhulumende weZanu PF akazimiselanga ukuhlalaphansi lezizalwane zeZimbabwe kulungiswe uhlupho lwezombusazwe.
Bathi okuthelela ulaka yikuqhubeka komkhuba wokuhlukunyezwa kwamalunga amabandla aphikisayo lokusetshenziswa komthetho, amapholisa, amasotsha lephalamende ukugcwalisa izifiso zeZanu PF.
Umgcinisihlalo webandla leCitizens Coalition for Change kwele South Africa uMnumnzana Trust Ndlovu uthi osekusenziwa yiZanu PF ukugogodela amandla ombuso sokuyangisa.
“Umhlolo owenzakala eZimbabwe. Nango uSpeaker of parliament usethathanje incwadi eyifraudulent letter ebhalwe ngumuntu ongasilo ilunga lethu abesethatha isinqumo ngaleyo ncwadi.”
Unobhala jikelele webandla leZimbabwe Communist Party, uMnumnzana Ngqabutho Mabhena, uthi inhlupho zonke ezibhekane leZimbabwe okwakhathesi zadalwa yiZanu PF ngakho ngeke zilunge iZanu PF ilokhu isasekhona.
“Into efunakalayo eZimbabwe yikuthi sibambane sonke siyizizalwane zeZimbabwe kungakhathalekile lokuthi ungumhlobo bani lokuthi uzalwa kuphi silwisane leZanu pf siyikhuphe embusweni sibe sesisakha umnotho welizwe lethu ukwenzela ukuthi abantu bathole imisebenzi njalo sibe lenhlalakahle.”
Obemele intsha yebandla leZapu kule ingxoxompikiswano uMnumnzana Lindani Nkomo uthi ukhetho olukhululekileyo yinto yakuqala efuneka eZimbabwe kodwa ukuze lwenzeke kufanele kuqalwe kulahlwe ikomishini yezokhetho ekhona khathesi.
“Indlela esizibona zingasebenza yikuthi manje njengoba iSADC ibikhiphile ireport yayo, silethemba lokuthi singahlala layo singamabandla sonke sihlangene kube yibo abafaka iZEC kumbe ama observers phambi kokuba siye ekhethweni mhlawumbe utshintsho lungaba khona.”
UMnumnzana Anadi Arnold Sululu obemele ibandla elitsha elisanda kubunjwa ele E Movement uthi sekuyisikhathi sokuthi izizalwane zeZimbabwe zekele ubugwala zisukume zisebenzele inkululeko yazo hatshi ukufuna ukwenzelwa zinkokheli.
“Abantu kufanele bephume even ama small parties. Siqalise ukutshengisela igovernment ukuthi siyakhala ngobunengi bethu. Inkinga esiyibonayo okwamanje yikuthi thina inengi lethu siyesaba. There is so much fear.”
Omela ibandla leZanu PF yena ubungekho kule ingxoxompikiswano lobanje ubenxusiwe. Kodwake umkhokheli waleli bandla njalo engumongameli welizwe umnumnzana Emmerson Mnangagwa usekubeke kwacaca ukuthi labo abacabanga ukuthi kuzakuba lolunye ukhetho kumbe uhulumende womanyano kabakhohlwe baphinde ngoba lokho ngeke kwafa kwenzeka.
Inhlanganiso yeAfrican Diaspora Forum ebiqoqe ingxoxompikiswano le ithi le yinto ezahlala isenzeka kuze kutholakale isisombululo sohlupho lweZimbabwe.