Kuqhubekela phambili ukuxokozela kubandla leCitizens Coalition for Change uMnu. Sengezo Tshabangu esithi kumele wonke amalunga edale lephalamende lawe Senate akubandla leli angene imihlangano yonke hatshi lokhu okwethulwe izolo nguMnu. Nelson Chamisa.
UTshabangu, othi ungunobhala jikelele weCCC, wethule umbiko namuhla othi uzaxotshisa bonke abangasoze behambe ephalamende lakumakhansili.
Uthi uyakwazi ukuba amalunga eHouse of Assembly akavunyelwa ukungena imihlangano yedale leli eyisithupha kodwa kungedlula lokhu, kumele bonke belandele akutshoyo hatshi okuka Chamisa.
Ibandla leCCC lithi uChamisa wenze kahle ukuthi kumiswe amalunga ebandla leli edale lephalamende kanye lakumakhansili kuze kubiselwe abanye babo abaxotshiswe nguTshabangu. Lithi kumele kulungiswe njalo ezokhetho ukwenzela ukuba kube lohulumende kazulu kwele Zimbabwe.
Ukuze sihlaziye udaba lolu sixoxe loSenator Nonhlanhla Mlotshwa okubandla leCCC othi okwenziwa nguTshabangu kuveza ukuba esetshenziswa libandla leZanu PF.
Kodwa uMnu. Joseph Tshuma okudale leZanu PF Central Committee uyakwala lokhu esithi iCCC kumele ilungise okuyihluphayo hatshi ukudonsela ibandla elibusayo edakeni.