Bekuxokozela edale lephalamende namuhla lapho amanye amalunga awebandla leCitizens Coalition for Change abadatshukelwe yizigqoko betshukana lamapholisa kulandela ukuxotshiswa kwabanye babo edale leli nguMnu. Sengezo Tshabangu ozithi ungunobhala jikelele walelobandla leCCC.
Kuqhamuke ingxabanxoza edale lephalamende, umalwuli waleli dale, uMnu. Jacob Mudenda esanda kubika ukuba kulamalunga alitshumi lane – 14 abebandla leCCC asebexotshiswe kudale leli nguTshabangu. UMudenda wethule amagama la ngesikhathi kuqala ihlandla lakuqala ledale lephalamende eHarare.
UMudenda uthe uTshabangu lilunga leCCC njalo Incwadi ayilobele idale itsho ukuba abameli beCCC sebexotshiwe ephalamende.
"Ngalokho sesenze konke okufunakalayo emthethweni ukwazisa uMongameli welizwe le Zimbabwe Electoral Commission ukuba sekulezikhexe ephalamende kulandela ukuxotshwa kwamalunga edale lephalamende lawa."
UMudenda uqale ngokvumela ukuba aamalunga aweCCC, alitshumi lambili afungiswe ukuqala umsebenzi njengoba engenzanga lokhu ngesikhathi iphalamende ivula ngenyanga edluleyo.
Eqeda lapho, uhle wabala incwadi yakhe yona esolwe ngabeCCC abagoqela umkhulu webandla leli ephalamende, uMnu Amos Chibaya, besithi banikeza uMudenda incwadi eyakubeka sobala ukuthi konke okuhambelana ledale leli kumele kulotshelwe nguMnu. Nelson Chamisa umkhokheli wabo.
Ezama ukutsho umbono wakhe, ummeli weBinga North uMnu Prince Dubeko Sibanda, uhle walelwa ukukhuluma, usolomlomo esithi kaphume, kodwa wala.
UMudenda ucele amapholisa ukuba amncedise ukukhipha amalunga lawa kodwa ehlulekile kwaze kwabuya amapholisa ezomvikela aweviyo le Riot Police lapho amalunga eCCC ahle aqala ukuhlabele esala ukuphuma.
Kucine kusetshenziswa udlame ukuwakhipha ngesihluku esimangalisayo kwacina kulimala abanye. Abalimeleyo bagoqela umele weBudiriro North uNkosikazi Susan Matsunga kuthi ummeli webatsha eHarare uMnu. Takudzwa Ngadziore udatshukelwe yizembatho.
Elinye lamalunga aweCCC, uMnu Prince Dubeko Sibanda uthi kabasoze bavume ukuhlukuluzwa lokuxotshwa ephalamende ngumuntu abangamaziyo.
"Kasisoze sivume ukusetshenziswa libandla le ZANU PF besixotsha besebenzisa abantu esingabaziyo.”
Lokhu kusekelwe nguMnu Gift Siziba omela iTshabalala-Phelandaba esithi iCCC kayisoze ivume ukuxotshelwa abameli bayo.
“Ibandla le ZANU PF liyaqhubeka lisenza konke lokhu okungekho emthethweni kodwa thina njenge CCC sizalandela izifiso zabantu. Kabasoze basixotshe mahlayana."
Igqwetha elisebenza lifundisa umthetho wamalungelo oluntu ekolitshini le ZAOGA Ezekiel Guti University, uMnu Mcbeth Sithole, uthi kumele iCCC ilungise isisekelo sayo sombuso ukuze ivikele izinto lalezi.
“Kumele balungise ukuba kube lesisekelo sombuso webandla labo. ICCC ngendlela eyiyo yona akucaci ukuba ngobani abakhokheli. Akulunganga lokhu."
Edale lephalamende uTshabangu uxotshise aamalunga aweSenate ayisitshiyagalolunye abagoqela uMnu. Felix Mafa omela uBulawayo edale leli.
Imizamo yokuthola imibono yamalunga aweZANU PF yehlule ngoba uMnu Pupurai Togarepi okhokhela ibandla leli ubesedale lephalamende ngesikhathi iStudio 7 isiya emoyeni.
Ubona ngokukhitshwa kwemibiko kubandla le ZANU PF ubengakaphenduli imbuzo ayithunyelwe yi Studio 7.
UTshabangu uthi uxotshisa abantu laba ngoba elemvumo yokwenza lokhu kodwa ibandla leCCC lithi alimazi.
Embikweni esisanda kuwamukela, usomlomo wephalamende uMudenda uthi uzancitsha amalunga aweCCC iholo lenyanga ezimbili ngoba engabuyanga kulelidale kumahlandla ayisithupha okwakumele beqhube umsebenzi wephalamende.
Ayisikho kwakuqala ukuxotshwa kwamalunga ephalamende ngemva kokuba uMnu Douglas Mwonzora waxotshisa amalunga omanyano weMDC Alliance esithi ayengasalandeli iziqondiso zomthetho webandla leli ngo2020. Selilele ngogedla ibandla leMDC-T okwamanje.
ICCC ithi isiphanyeke udaba lolu emthethwandaba iphikisa inyathelo lokuxotshiswa kwamalunga alo nguTshabangu abathi wenza okwekhanda lakhe.