Usomlomo wedale lephalamende, uMnu. Jacob Mudenda, ukhuthaza abameli bephalamende ukuba bengayi kuleyondawo bafike bethule zwi. UMudenda uthi kuqakathekile ukuba bekhulume edale leli ngakho konke okwethulwa ngabanye babo lokufiswa nguzulu.
UMnu. Mudenda wethule lokhu emhlanganweni awuqhube ngomvulo lamalunga edale lephalamende asanda ukukhethwa nguzulu aselungiselela ukuqhuba umsebenzi wawo.
"Kulalabo abafika bethule nje ephalamende. Banengi abenza lokhu. Kabazange bavule umlomo nje loba ukutsho okukodwa zwi."
Ekhuluma ngokwethulwe nguMnu. Mudenda, uMnu. Gift Ostallos Siziva, omele iTshabalala-Pelandaba edale lephalamende njalo okubandla leCitizens Coalition for Change, uthi amalunga abo azakhuluma ngokuhlupha uzulu.
"Iphalamende umsebenzi wayo yikubhalwa komthetho. Kuqakathekile ukuba sikhulume lokubonisa umlandu. Umuntu nxa ephiwe umsebenzi lo kumele azi okufunakalayo."
UMnu. Daniel Mckenzie Ncube, omele iZhombe eNkabazwe, uthi kuqakathekile ukukhuluma mayelana lokufiswa nguzulu.
"Besikhuluma ngenhlelo okumele sizenze ngoba kuyithi esathunywa nguzulu we Zimbbawe ukuze kube lengqondo ezijulileyo."
Banengi abameli bedale lephalamende ababikwa ukuba lokhe bangena kuleyondawo abazange bethule lutho. Ugwalo olujulileyo olulotshwa lidale leli olweHansard lubika ukuba abantu laba bagoqela uNkosikazi Getrude Chibagu, uMnu. Richard Musiyiwa oweMutoko East, uMnu. Tongai Moyo oweHarare South, uNkosikazi Judith Tobaiwa oweKwekwe Central labanye. Asenelisanga ukukhuluma lamalunga la ngoba abengaphenduli omakhalekhukhwini.
UNkosikazi Chibagu, owebandla leZanu PF, uthi okunye okwenza bengakhulumi edale lephalamende yikuba kwesinye isikhathi amabizo abo awaqanjwa ngusomlomo.
"Ngithi mina ukukhuluma kwesinye isikhathi siyabe sifuna ukukhuluma kodwa kabasiqambi, sicina sibeka izandla phansi."
Ingcitshi kwezombusazwe, uMnu. Hebert Chamuka, okunhlanganiso ye People's Unity of Zimbabwe kodwa okhuluma ezimele, uthi kuqakathekile ukuba amabandla afundise abameli bawo ukuze babe lesibindi sokukhuluma ephalamende.
"Udubo lwethu ngabantu laba abavotelwayo ngoba kabakhulumi bathatha izitulo bahlale nje. Bathule nje kodwa besidla imali kahulumende'
Idale lephalamende likhangelelwe ukuqhuba umhlangano wakuqala kusasa kulandela ukuvulwa kwalo ngokusemthethweni nguMongameli Emmerson Mnangagwa ngeviki edluleyo.
Your browser doesn’t support HTML5
Udaba esilwethulelwa nguMlondolozi Ndlovu