Iqembu labafana abaleminyaka engaphansi kwamatshumi amabili elimela isikolo seSt Eric esiseMashonaland West yilo intshantshu zalonyaka ezomncintiswano weNational Association of Secondary School Heads.
Iqembu leSt Eric linqobe eleMzilikazi nge 1 ka nya kufinal edlalwe namhla ekuseni enkundleni yeBarbourfields.
Iqembu leMzilikazi yilo ebelikhangelelwe ukuba lingaphakamisa linkezo njengoba belidlala lingekhaya kodwa umqeqetshi walo uKhonzani Ncube uthi basuke bazigwaza ngowabo.
Mzilikazi High School coach Khonzani Ncube
“Umdlalo awusahambanga ngendlela ebesikhangele ngayo. Senze iphutha emuva lapho okube lokuphambanisana phakathi kukanozinti lemvimbi zethu abangasakhulumisananga kahle.
Sithanda ukubonga abeProton ngokusilethela lumncintiswano njalo sikhangelele ukuthi baqhubekele phambili besenza njalo ngoba lokhu kwenza ukuba abadlali bethu becine bebonakale bakhethwa kumaqembu amela ilizwe,” kutsho uNcube.
Umqeqetshi weqembu leSt Eric uFarai Hanyani yena uthi inkuthazo ayiphe abafana bakhe yiyo edale umehluko.
“Esenelise ukukwenza kuhle yikutshela abadlali bethu ukuba kabazithembe ngoba besikwazi ukuba abeMzilikazi bazahlasela kakhulu njalo senelisile ukuvikela isango lethu ngemva kokuba sesihlohlile,” kutsho uHanyani.
NASH Under 20 Boys soccer tournament
Kusigaba se semi – final iqembu leSt Eric linqobe eleHwange nge 1 ka nya kuthi eleMzilikazi lona linqobe eleCresta College nge 3 ka nya.
Sikhangele impumela yemidlalo yeCastle Lager Premier Soccer League edlalwe namhla.
Iqembu leSimba Bhora libhaxabule ele Highlanders nge 3 ka nya ngaseBaobab, iqembu leFC Platinum linqobe ele Ngezi Platinum Stars nge 1 ka nya ngaseMandava, iqembu leChicken Inn libe ngutshiki lobhanqa 1 ka 1 leManica Diamonds ngaseLuveve, kuthi iqembu leBlack Rhinos litshaye eleZPC Kariba nge 4 ka 3 ngaseBata.
Limpumela itsho ukuba iqembu FC Platinum selikhuphuke layahlala endaweni yesibili engalaneni yemiklomelo lilemiklomelo engamatshumi amane lesithupha (46) kuthi eleNgezi Platinum lona elihlezi phezulu lilemiklomelo engamatshumi amahlanu lowodwa (51).
Kusasa ngeSonto iqembu leHwange lizemukela eleCaps United ngaseColliery, eleDynamos lizadibana leleHerentals ngaseNational Sports Stadium, iqembu leYadah lizangqikilana leleTriangle ngaseBaobab, iqembu leGreen Fuel lizadlala leleCranborne Bullets ngaseGreen Fuel kuthi iqembu leSheasham lizatshayana leleBulawayo Chiefs ngaseBata.
Your browser doesn’t support HTML5
Ezemidlalo loJoseph Njanji