Isiphathamandla sekhomithi ekhokhela umdlalo wenguqu kulezinsuku eye Zimbabwe Football Association Normalisation Committee, uSikhumbuzo Ndebele, usebuke imizamo esiqale koBulawayo eyokuvimba izehlakalo zobudlwangudlwangu ezinkundleni zemidlalo yenguqu.
Ekhuluma emhlanganweni obubizwa ngokuthi yiSports Indaba oqoqwe ngabephephandaba eleSunday News ngenhloso yokuhlaziya udaba lokuba yiwaphi amanyathelo angathathwa ukuze kuqedwe izehlakalo zodlame ezinkundleni zomdlalo wenguqu, uNdebele uthe loluhlelo selubavulele indlela labo njengeNormalisation Committee.
ZIFA Normalisation Committee member Sikhumbuzo Ndebele
“Kuyabongeka esikubonayo namhlanje lapha okuyikho okusihlanganise lapha koBulawayo. Umcimbi lowu uqakathekile ngoba yiwo ozakwenza ukuba lathi njenge ZIFA NC sithole amathuba awokuba lokhu esifisa ukukufaka sizama ukuvikela ababukeli bebhola ukuba bebukele bekhululekile kufezeke. Imizabalazo enjengalowu iyaqakathekiswa yikho lathi sithe sibaseke ngokuza lapha sibancedise lapho esenelisa khona,” kutsho uNdebele.
Umsekeli kamgcinisihlalo weqembu leHighlanders uFiso Siziba uthe umdlalo webhola uyibhizimusi njalo izehlakalo zobudlwangudlwangu zisuka zilambise labo abathola imali ebholeni.
“Abathengisayo bayenelisa ukuba baphile ngenxa yomdlalo wenguqu. Ngalesosizatho ke kumele sivikele umdlalo wenguqu. Lapho ozwa khona kusithi phazamisa umdlalo wenguqu ngokuganga kumele ucabange ukuba zingaki imuli eziphila ngomdlalo webhola. Labanikazi benkundla laba omasipala labo bakubhizimusi okokuthi bayalahlekelwa kakhulu nxa inkundla zabo zingasebenzi,” kutsho uSiziba.
Owadlalela iqembu labesifazane elimela ilizwe njalo oseyinkokheli yebhola labesifazane koBulawayo uFungai Nyamutukwa – Mpfeka, uthi abadlali kumele bafundiswe kabanzi ngemithetho elawula umdlalo wenguqu ukuze bangavubeli umsindo.
Fungai Nyamutukwa - Mpfeka
“Kumele sifundise abanye bethu njalo kumele siqale ngabaqeqetshi kanye labadlali ngemithetho yenguqu. Kwesinye isikhathi abadlali yibo abaqala ukukhomba unompembe ngomunwe ngoba bengavumelani lesinqumo asithetheyo. Khonokhuyana kudala ukuba abalandeli bayithenge indaba kucine kuvuka umsindo ongapheliyo,” kutsho uNyamutukwa – Mpfeka.
Abanye abaphatheke kulumhlangano ngabagoqela amapholisa, inhlanganiso yePremier Soccer League yona ebimelwe nguKennedy Ndebele, inhlanganiso yeSports and Recreation Commission ebimelwe nguSam Dzvimbu.
Bekukhona njalo abameli bamaqembu abalisa eleHighlanders, eleDynamos, Chicken Inn kanye leBulawayo Chiefs, izakhamizi zamalokitshi agqagqele inkundla yeBarbourfields kanye labalandeli bomdlalo wenguqu.
Your browser doesn’t support HTML5
Udaba lobudlwangudlwangu kunguqu siluphiwa nguJoseph Njanji