IZimbabwe ihlanganyele ndawonye lamanye amazwe ekuthakazeleleni usuku lwababalisi olwe World Teachers Day oluthakazelelwe minyaka yonke mhlaka 5 Mfumfu.
Usuku lolu luthakazelelwa ngesikhathi ilizwe lilahlekelwa ngababalisi abanengi abaphuma elizweni besiyadinga imisebenzi kwamanye amazwe.
Ababalisi laba bakhala ngeholo eliphansi lezinye indubo ezigoqela ukuswelakala kwempahla yokusebenzisa emsebenzini lokusinda komsebenzi ngenxa yokuba ababalisi bebalutshwane kakhulu.
Ekhuluma loTaboka Ncube oweStudio7 ecingweni ese-Inyathi uMnu Lovejoy Sibanda omela amalungelo ababalisi ephansi kwenhlanganiso yababalisi eyeProgressive Teachers Union Zimbabwe (PTUZ) uthe baqhubekela phambili bekhuluma lohulumende ukuze abisele isithunzi sababalisi esesitshabalaliswe liholo eliphansi.
Inhlanganiso ye United Nations Organisation for Education, Science and Culture (UNESCO) ngo 1994 yabetha umhlaka 5 Mfumfu njengelanga lokubonga umsebenzi oqhutshwa ngababalisi eleWorld Teachers Day kumbe i-International Teachers Day.
Your browser doesn’t support HTML5
Ingxoxo lo Mnu Lovejoy Sibanda