UMongameli Cyril Ramaphosa wakwele South Africa ngolwesine wethule ngokusemthethweni iviyo labalindi bemingcele yonke yokungena kwabantu elizweni lakhe, bevela emazweni angomakhelwane, eleBorder Management Authority
Esethula iviyo labalindi bomngcele laba enkundleni ye dolobheni leMusina, uRamaphosa uthe ukulindwa komngcele kuyinto eqakatheke kakhulu kwezokuphepha kwelizwe, ekhuthaza bonke abafuna ukungena kwele South Africa ukuthi benze njalo ngokusemthethweni hatshi ukufohla.
URamaphosa wethule inkulumo le, ngemva komhlangano awuqhube lomongameli Emmerson Mnangagwa emngceleni we Beitbridge, ethi bobabili bavumelene ukuthi imizamo yokuvikelwa kwamazwi lokungena kwabantu elizweni ngokusemthethweni kuqakathekile.
“Sivumelene ukuthi amazwe ethu kufuze ahlalisane ngokuthula lezizalwane zamazwe ethu ziphile zingesabi lutho.”
South Africa Border Management Authority
Leliviyo elilamandla alingana leviyo lamabutho lamapholisa, lizaqapha imingcele yelizwe lisebenzisa abalindi ngenhloso yokwenqabela ukungena kwabantu lempahla elizweni ngokungekho emthethweni. Yiziphathamandla zaleli vuyo njalo ezizalawula ukungena lokuphuma kwabantu endaweni ezisemthethweni.
Ugatsha lwendaba zasekhaya lona luzabhekana lalabo asebengenile elizweni kanye lokupha abahlali bakweleSouth Africa incwadi zonke abazidinga empilweni.
Ukugcwala kwezizalwane zakwamanye amazwe ezingene kweleSouth Africa ngokungekho emthethweni sekuvuse enkulu intukuthelo izakhamizi zibethesa umlandu wokweba imisebenzi lokudala amacala.
Isizalwane seZimbabwe njalo engumgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi bayemukela ukwethulwa kwaleliviyo kodwa akusiso sisombululo sokuqeda uhlupho lwabeZimbabwe abangena kweleSouth Africa ngokungekho emthethweni.
South Africa Border Management Authority Launch
“Kumele kulungisiswe umnotho wasemazweni angomakhelwana ukwenzela ukuthi abantu bangabuya ngokusemthethweni ngoba siyakwazi ukuthi okwenza ukuthi abantu babuye yikuthi umnotho emazweni angomakhelwana uphansi kakhulu.”
Inengi lezizalwane zakweleSouth Africa selemukele ngenjabulo ukwethulwa kwabalindi bomngcele besithi lokhu kuzaqeda uhlupho lokuminywa ngabantu bokuza elizweni labo. Kodwake esinye isizalwane seSouth Africa obona ngokuqoqwa kwenhlelo zenhlanganiso yeSisonke People‘s Forum Umnumnzana Freeman Bhengu uthi kayikho into ezakwenziwa yileli viyo.
“Into esiyicelayo yikuthi uhulumende akafake amasotsha emabordeni aseSouth Africa. Kube ngamasotsha amatsha asuka kutraining abangakabi corrupt abazasebenzela iSouth Africa right.”
South Africa Border Management Authority
Kodwake umsekeli kasikomitshi okhokhela iviyo leBorder Management Authority umnumnzana Steven Van Neel uthi kuzabe sekulomehluko omkhulu kakhulu kusiyaphela umyaka ogcweleyo.
“Nxa kusitsho ukuthi sichithe isikhathi esinengi sibopha abangena elizweni ngokungekho emthethweni sizakwenza lobanje kungayisiwo wodwa umsebenzi wethu.”
AbeBorder Management Authority, bathi ngaphandle kokuvimba abangena elizweni ngokungekho emthethweni bazakwenza ukungena lokuphuma kwabantu elizweni kube lula ikakhulu ngesikhathi samakhefu, ukuze kungabi lendwendwe ezinde zabantu abadinga ukuncedwa ukuchapha umngcele.
Your browser doesn’t support HTML5
Udaba esilwethulelwa nguThuso Khumalo