Inhlanganiso emele izisebenzi eyeZimbabwe Congress of Trade Unions ikhala ngokwenzekala kumankampanini abadabuka kwele China, ikakhulu kwezokwemba amatshe aligugu lokunye.
I-ZCTU ithi kwephulwa ilungelo loluntu lesisekelo sombuso welizwe kasilandelwa, kungenzeka ingozi zokulimala. Ithi lokhu kuvame endaweni ezifana leHwange, okulamalunga abo atshaywa njalo ngabaqhatshi abangazwisisi ulimi lwabo.
Bekuhlafunwa indaba ezitshiyeneyo namuhla eVictoria Falls emhlanganweni wezisebenzi, oqoqwe ngabe National Social Security, lapho obekulabamele uhulumende kanye lamankampani azimeleyo. Bebexoxisana ngendlela zokwehlisa ingozi emisebenzini, iholo lezisebenzi kanye lokukhahlanyezwa kwezisebenzi ngabadabuka kwele China abalamankampani eZimbabwe.
Inhlanganiso yeZCTU ithi kumele kube lelihlo likahulumende kulokhu.
Umqali walindaba kube ngumongameli walinhlanganiso, uNkosikazi Florence Taruvinga, otshele umphathintambo kahulumende obona ngenswelo zikazulu lezisebenzi olwePublic Service, Labor and Social Welfare, uMnumzana July Moyo, kanye lendlu yonke kulumhlangano ukuba okwenzakala kumankampani abadabuka kwele China kudinga ukuthathelwa inyathelo.
“Sesibekezele kakhulu umkhuba omubi oyenzakala ematshayineni la ngelokuthi ngama ngama investors lasemigodini ngokuvika nje ngokuthi kudalwa imisebenzi, kodwa umbuzo usekuthini kuze kubenini kuqhubeka kunje.”
NSSA Conference on Safety and Health at Work in Vic Falls
Inkulumo kaTaruvinga ingcizelelwe njalo nguMnumzana Japhet Moyo, unobhala jikelele walinhlanganiso, othi umthetho kawujezise abantu laba, ngoba imibiko yokwephulwa kwelungelo lezisebenzi lezi ibikwa phose viki zonke, ikakhulu kulabo abemba amalahle, igolide lokunye.
“Uhulumende kaqinise ama inspection site, lo otholakale ephula umthetho kufanele ahlangane lomthemtho singakhangeli ukuthi umuntu uvelela kuliphi icele lelizwe kumbe lomhlaba singakhangeli njalo ukuthi ngumuntu esilobuhlobo laye.”
Phezu kwalokhu, uNkosikazi Taruvinga, ukhala ngezinga lokwehla kwemiholo yezisebenzi zakuleli, kanye lokuwa kwesisindo semali yakuleli, athi sekunqunule izisebenzi kanye lalaba abempentsheni, athi basebuyangeni.
“Indaba zokugugudeka kweholo ziqhubeka kusiba yizo ezidala umkhuhlane wengqondo kuzisebenzi esizimeleyo. Siyaqhubeka sicela ukuba izisebenzi lezi ziphathwe ngembeko langenhlonipho laseholweni labo.”
Kodwa evula lumhlangano, uMoyo kaphendulanga izikhalazo lezi. Uthe ulokudana okukhulu ngezinga lengozi ezibikwa emisebenzi, athi kunje kuphenyo olwavezwa ngoNcwabakazi, sekwafa abedlula amatshumi amathathu engozini zemisebenzini kwalimala njalo abedlula inkulungwane ezimbili.
NSSA Conference on Safety and Health at Work in Vic Falls
Phezu kwenani leli, kumalanga ambalwa kubhubhe njalo otsheketsha abedlula itshumi kwalimala abanye kulandela ukudilikelwa lunxiwa lomgodi eChegutu besemba igolide.
UMoyo uthi lokhu kufuze kuthathelwe inyathelo.
“Akukhethi lokhu ukuthi umuntu ubulele yisiphepha, ubhubhane, umgodi umdilikele kumbe kube lengozi emsebenzini, amanani la asitshengisa inziki yohlupho esiphakathi kwayo njalo siqhubeka silahlekelwa ngabantu abathwele umsebenzi omkhulu.”
Ukuvikela lezingozi, umholi wenkampani yeKhayah Cement, uMnumzana Innocent Chikwata, uthi ingalo yomthetho kufuze yelulwe.
“Umuntu kumele afike esikhathini sokwazi ukuthi kuvele kufuze enzeni, kodwa ukuze kufikwe lapho, ingalo yomthetho kufuze iqine eyenza ukuthi abantu balandele khonokho okuyabe kutshiwo.”
Ezinye izikhulumi zigcizelele njalo ekukhuthazeni uhulumende ukuba apasise umthetho ozavumela inhlanganiso ezifana leZCTU ukuba zifinyelele loba kuyiphi indawo ziphenya ngokuhluza izinga lokuphathwa kwezisebenzi, kanye lezembatho abaziphiwayo.
Kukhuthazwe njalo ukuba uhulumende akwenze lokhu ngokuphangisa ukuze kwehliswe ingozi zokulimala emsebenzini.
Umhlangano lo uzagqitshwa kusasa, lapho okuzalotshelwana njalo impumela yokuzokwenzakala kusasa ukuze kusindiswe impilo yezisebenzi.
Your browser doesn’t support HTML5
Udaba esilwethulelwa nguNokuthaba Dlamini