UMnu. Sengezo Tshabangu, othi ungunobhala jikelele webandla leCitizens Coalition for Change, oxotshise amalunga edale lephalamende lamakhansila ebandla leli, uthi kumele abakubandla leCCC bethule zwi ngoba kunengi azakwenza kulabo abafaka nguMnu. Nelson Chamisa labanye babo ezigabeni ezitshiyeneyo kukhetho olwaqhutshwa ngoNcwabakazi.
UTshabangu ulobe ingcwadi eveze ukuthukuthela ephendula uMnu. Gift Ostallos Siziba, umsekeli wesikhulumeli seCCC, esithi uSiziba ngomunye walabo abazifaka kukhetho betshotshozelwa nguChamisa.
Uthi uselobe isisekelo sombuso webandla leli esilakho ukusetshenziswa emthethwandaba uma uChamisa labanye bakhe bezaphanyeka lokhu akwenzayo enkantolo.
Uthi kasoze abuyele emuva ngokuxotshisa amalunga edale lephalamende agoqela uMnu. Pashor Sibanda oweCowdray Park, uMnu. Eric Gono oweLobengula-Magwegwe, uSenator Felix Magalela Mafa Sibanda labanye kanye lamakhansila athi bangena ngudlu kukhetho.
UTshabangu wancedisa ukuba kube lamalunga amanengi angena kukhetho kuzigaba ezifanayo lapho ancintisana khona lamele ngabakhethwa nguChamisa labanye bakhe.
USiziba uthi uTshabangu uthunywe ngamapholisa ensitha lebandla leZanu PF. Ibandla leli liyakuphika ukubana lingenela indaba zeCCC.
Lokhu sokutshiye abantu bethithibele. Kuvela ngaphi konke lokhu njalo kuzaphetha ngani?
USenator Khaliphani Pugeni uthi kunengi okwenzakala kubandla leCCC okusolswa ngabantu eMatabeleland abathi uChamisa uletha abantu bakhe.
Kodwa uMnu. Fortune Mlalazi, okubandla leCCC, uthi kulesabdla semfane kudaba lolu.