Abanini bamabhizimusi asathuthukayo bathi sebethole ulwazi olumqoka emhlanganweni osaqhubeka edolobheni lakoBulawayo, obahlomisa ngendlela yokuthuthukisa amabhizimusi nxa kulezehlakalo ezingawachitha, ezifana lomkhuhlane weCOVID 19 kumbe ukuqhamuka komlilo, osokubangele ukuthi abanye belahlekelwe yimisebenzi.
Umhlangano lo, osungulwe ngoMvulo njalo ogqitshwa ngoMgqibelo, uqoqwe yikhansili yakoBulawayo imanyene lenhlanganiso ye International Labour Organizaton, Bulawayo Chamber of SME’s, kunye logatsha lukahulumende olubona ngokuthuthukiswa kwamabhizimusi asakhulayo.
Ukuze sizwe ukuthi abaphatheka kulumhlangano bafundani, uSithandekile Mhlanga weStudio 7 uxoxe loNkosazana Bakani Ncube, umqoqi wenhlelo kunhlanganiso yeBulawayo Vendors and Traders Association, ongomunye wabaphakulela abakulo umbuthano ulwazi.