Umongameli Mokgweetsi Masisi wakwele Botswana uthi uyakuzwisisa ukuthi kungani abeZimbabwe bebalekela elizweni lakhe ngobunengi. Lokhu kuza ngesikhathi eleBotswana lisithi libuyisele emuva abeZimbabwe abedlula inkulungwane abakade bangene kulelozwe okungekho emthethweni kunyanga ezintathu ezidluleyo.
Ekhuluma emhlanganweni lezakhamizi zeMasunga duze lomngcele weZimbabwe ngoLwesithathu, uMongameli Masisi uthi izijeziso zenotho yizo ezixotsha abeZimbabwe ukuthi bangene kweleBotswana ngenani eliphezulu.
Uthi yikho ehlala njalo nje ekhala ngokuthi ziyesulwe izijeziso zenotho ngoba eleBotswana lithwala nzima ngenxa yesimo somnotho esikhona eZimbabwe.
“Ngiyazwisisa njalo ngiyazi kakhulu udubo olubhekane lelizwe leZimbabwe. Uma ungumakhelwane lomuntu ebhekane lodubo ebalekela kuwe, uyamsiza, hatshi ukumxotsha. Ngingomunye waba khulumela eleZimbabwe phezu kokwesulwa kwezijeziso zomnotho.”
Umphathintambo obona ngendaba ezenzakala kweleBotswana, uNkosikazi Annah Mokgethi uthi udaba lwabeZimbabwe abangena eBotswana okungekho emthethweni luqhubeka lukhathaza.
“Esikukhuthazayo yikuchapha umngcele okusemthethweni. Enyangeni ezinthathu ezidluleyo kuphela, sibuyisele abeZimbabwe abadlula inkulungwane bengene okungekho emthethweni.”
UMokgethi uthi okunzima yikuthi izizalwane zeBotswana yizo ezincedisa abeZimbabwe ukungena lokuhlala elizweni okungekho emthethweni, ngokubapha imsetshenzanyana.
Noma kulokukhonona ngokungena kwabeZimbabwe okungekho emthethweni, uMasisi uthi uzaqhubeka ekhulumisana lomunye wakhe, uMongameli Emmerson Mnangagwa phezu kokusetshenziswa kwesithupha ukuchapha umngcele.
UMasisi uthi noma nje kulobunzima, kumele kukhulunyiswane ngoba amazwe womabili alobudlelwano.
“Abantu beZimbabwe ngabantu bethu lathi. Yizihlobo zethu. Kungabakhona abakwenzayo esingakuthandiyo kodwa okukhulu yikhulumisana.”
Omunye oweZimbabwe ohlala kweleGaborone, umnunzana Mkhululi Moyo uthi noma nje amazwi kamongameli Masisi eduduza, kumele amazwe angomakhelwane azame ukufaka umfutha ukuthi izinto zihambe kuhle eZimbabwe.
“Siyakuzwa okutshiwo ngumongameli Masisi, kodwa uma sikhangele okwenzakala ngesikhathi sokhetho, uzabona ukuthi amazwe aweSADC kunengi abangakwenza ukuthi kuvimbe khona esikubonayo ukuphuma kwabantu elizweni begcwala amazwe angomakhelwane.”
Kusenjalo eleBotswana liphezu kokuloba ugwalo olweMigration Policy oluzaphathisa ukuhluza abangena elizweni ukuthi bafakwa ngaphansi kwaluphu uluhlu.
Uhulumende uphathisana lenhlanganiso ebona ngokuhamba kwabantu phakathi kwamazwe atshiyeneyo, eye International Organisation for Migration (IOM) phezu kwaloluhlelo ukuzwe kubonwe ukuthi ngobani abangaphiwa amaphepha okubayizizalwane zeBotswana, icitizenship, abangaphiwa ubuphepheli, kumbe abangabuyiselwa emuva.