Amalunga edale lephalamende awebandla eliphikisayo eleCitizens Coalition for Change, abasanda kukhethwa nguzulu, balakho ukuncitshwa inhlawulo zabo, lama coupons awamafutha ezimota kulandela ukwala kwawo ukuya edale namuhla ngesikhathi livulwa okusemthethweni nguMongameli Emmerson Mnangagwa.
UMongameli Mnangagwa uvule okusemthethweni idale lephalamende namhlanje lapho amalunga ebandla le ZANU PF abethe gwaqa kusakhiwo esitsha saleli dale esiseMount Hampden, kodwa abe CCC kabazange babuye.
Ekhuluma ngesehlakalo lesi, usomlomo wedale lephalamende uMnu Jacob Mudenda uthe okwenziwe ngamalunga edale lawa kutshengisa ukweyisa lelidale ngakhoke balakho ukujeziswa. Uthe kuveza ukungahloniphi abantu ababakhethayo.
"Okwakuqala abantu beCCC abasoze bathole amafutha ezimota ukuba baye ezindlini zabo. Okwesibili ukuhlala kwabo emahoteleni ngemali yabantu, sizabathathela leyo mali kuholo labo.”
Kodwa okhokhela amalunga eCCC edale leli, uMnu. Amos Chibaya, uthi kabayanga edale lephalamende ngoba uMnangagwa waqila kukhetho.
"Iphalamende ayisiso sikolo sabantwana lapho okulabaphathisikolo. Asisoze silandele iphalamende lapho okulomuntu owaqila ukhetho. Ngalesisizatho asisoze siye. Akulandaba bengathatha imali asilandanga mali ephalamende.”
Ingcitshi kwezombusazwe esebenza kunhlanganiso yeZimbabwe Youth Arise, uMnu Blessing Sibanda, uthi ibandla leCCC kumele linanzelele inyathelo leli ngoba lilakho ukuzondisa abantu ababavotelayo.
"Lokhu kutshengisa ukuba kukhona ukungavumelani okukhona. Bevotelwa ephalamende uzulu wathi kabahambe bayakhuluma okubahluphayo bazakwenza njani nxa bengekho ephalamende.”
Ekhuluma ephalamende, uMnangagwa wazise ukuba uhulumende wakhe uzimisele ukulungisa indubo ezibhekane lozulu weZimbabwe. Ukhuthaze iphalamende ukuba ilungise imithetho ezaletha intuthuko kuzulu.
"Ngikhuthaza abameli bephalamende ukuba kakwenziwe imthetho ezalalela izifiso zika zulu hatshi ukwenza okwentando yabo."
UMongameli uthe umthetho ofana lowe Private Voluntary Organizations bill, oweMines Minerals Bill, Broadcasting Services Act, Veterans of the liberation struggle Act leminye kumele ilungiswe ngesiphangiphangi.
Ingcitshi kwezombusazwe esebenza kunhlanganiso yeAfrican Youth Generation, uMnu Liberty Sibindi uthi kumele idale lephalamende liqale ukukhuluma izifiso zikazulu.
Ekuvulweni kwephalamende bekulabahluleli bemadale aphezulu, abaphathintambo bakahulumende lezisebenzi zika hulumende