UMongameli Emmerson Mnangagwa uthi uhulumende wakhe uyaziqhenya ngokuthuthuka komnotho welizwe, olungiswa ngabadabuka eZimbabwe. Kodwa ingcwethi kwezomnotho zithi uMnangagwa ugida eziqakezela ngoba umnotho welizwe kawuthuthuki ngemfanelo.
Wethule lamazwi namuhla emhlanganweni weZimbabwe Economic Development Conference eVictoria Falls, okubuthene iziphathamandla zikahulumende, osomabhizimusi lengcwethi ezihlaziya ezomnotho.
Esipha umzekeliso walintuthuko, uMnangagwa uthe kuhulumende wakhe, imigwaqo isisakhiwa yizifundiswa zakuleli ngentengo ephansi kakhulu, osekwehlukile lohulumende wayizolo athi wayeletha omanjinela bakwamanye amazwe ukuzokwenza msebenzi munye.
Wengeze esithi umnotho lo ubuye njalo wakhuliswa luhlelo lweIntwasa abalwethulayo kubalimi bemaphandleni, kanye lendlela ezehlukeneyo zokulima ingqoloyi, athi zinceda kakhulu ukulwisana lendlala.
Zimbabwe Economic Development Conference
“Sesasungula indlela zokulima ezitsha ebantwini ngehlelo lwe Pfumbudza, savula ama irrigation, sekhuluma kunje silengqoloyo eneleyo ngenzuzo yethu esizenzela yona.Kwezokwakhiwa, kufuze sikhuthaze abantwabethu ukuba ngamanjinela besakhele imigwaqo, amadamu, njalo lokhu sikwenza loba siphakathi kwamasanctions, lelizwe liyakhula nxa siliqathanisa lamanye kuzwekazi yomhlubulo we SADC. ”
Lokhu kufakazwe njalo ngumgciningcebo kahulumende, uMnu. Mthuli Ncube, othi kusukela ngomnyaka ka2021, eleZimbabwe selikhule ladlondlobala kwezomnotho, njalo lokhu kusazoqhubeka.
“Umnotho wethu usaqhubeka ukhula ngendlela encomekayo, ngomnyaka ka2021 sakhula nge 8.5 percent, saya ku 6.5 kumnyakophelileyo.Uphenyo luthi ilizwe leli likhula kakhulu emhlubulweni we Africa lakuzwekazi lonke, njalo impawu zikhombisa ukuba sizakhula njalo nge 5.3 percent ekupheleni komnyaka lo.”
UNcube uthi lokhu kudalwa yinzuzo yezomnotho wakuleli egoqela ukwenjiwa kwamatshe aligugu lokunye, ezokwethekelela ilizwe kumbe i-tourism, kanye lezokulima. Kodwa ingcwethi ecubungula ngezomnotho, uMnumzana Rejoice Ngwenya, okunhlanganiso yeCommon Market for Liberal Solutions, uyakuphikisa lokhu.
Zimbabwe Economic Development Conference
“Nxa kuthiwa ilizwe liyakhula, ubufakazi busesikhwameni semali kazulu. Uma singena ezitolo ukudla akuthengeki, emakhaya ontanga batshona bebhoda akulamsebenzi, imali yethu iyaphephuka, phinde izibhedlela azilamithi abantu bayabhubha. Imigwaqo ibhidlizekile, akulamanzi empompini, izitemela akusela, akulamabhansi, phinde amagetsi lokhe ecitshwa.”
Kumhlangano munye, uNkosikazi Rosemary Mpofu oyisiphathamandla senhlanganiso yeConsumer Council of Zimbabwe, wethule ukudana ngezinga izizalwane zakuleli ezingasathembi ngayo uhulumende wazo, esithi ngokwenzeka nyakenye, akusela ogcina imali ebhanga. Uthi ingqobe isikunkokheli ukuze lokhu kulungisiswe.
“Bayakutshela ngokwenzeka ngo2008, lathi esikwaziyo. Kwaphinda njalo ngonyaka ka 2018 lo 19. Kwenzakalani kwabempentsheni, ngikhuluma ngabazali bethu, kodwa kuba sisaqhubeka singakuqondi lokhu kulungiswe kasiyindawo njengelizwe.”
UMnumzana George Guvamatanga, umabhalane omkhukhu wohlangothi lukahulumende olubona ngezimali olweFinance, Economic Development and Investment Promotion, utshela uMnangagwa ukuba ingcwethi lezi izolo zethule ukuba ukuze ilizwe leli likhule kwezomnotho, kufuze liqale ukusebenzisa imali yakuleli i-bond note. Uthi zikhuthaza njalo ukuba uhulumende alwisane lokuthengiswa kwemali ngokungekho emthethweni.
Emaphethelweni omhlangano lo kusasa, kukhangelelwe njalo ukuba kuphunywe lendlela ilizwe leli elingathola inzuzo kulabo ebathengisa ngokungekho emthethweni, okugoqela otsheketsha.
SEE ALSO:
Udaba Esilwethulelwe NguNokuthaba Dlamini