Abantu bakwamanye amazwe abaphephele kweleSouth Africa lamhlanje batshengisele emahofisini awenhlanganiso yomanyano wamazwe womhlaba eyeUnited Nations High Commission for Refugees bekhala ngokwephulwa kwamalungelo abo.
Ixhukwana leziphepheli ebelitshengisela leli lifike emahofisini enhlanganiso emela iziphepheli emhlabeni jikelele eyeUnited Nations High Commission for Refugees ePretoria bephethe amagwaliba abhalwe izikhalazo zabo.
SAF refugees demonstration
Akhona abebhalwe izikhalazo zabo zokufuna ukuphiwa incwadi zokuphephela kantike amanye abekhala ngokubotshwa mahlayana ngamapholisa afuna imali yesifumbathiso.
Obekhokhela abakade betshengisela laba, umnumnzana Olivier Kalenga uthi kunzima kakhulu kunengi labo ukuthola incwadi zokuphephela emahofisini ogatsha lwendaba zasekhaya ngenxa yokwanda kwenkohlakalo.
“Ungaze ube uphethe liphi iphepha nxa uthi uyengeza amalanga kufuneka imali yesifumbathiso.”
Umnumnzana Tshiaku de la odabuka kweleDemocratic Republic of Congo uthi bathwaliswe amagabha avuzayo ngamapholisa abababopha lanxa belazo lezincwadi ngoba befuna amantshontsho.
SAF refugees demonstration
Unkosazana Dolly Mbuyi uthe uhlupho olukhulu yikuthi inengi labantwana beziphepheli lezi kabasayi ezikolo njengoba kufuneka incwadi zokuphephela abangelazo.
La ngamazwi agcizelelwe ngesinye isizalwane seZimbabwe ebesikulokhu kutshengisela esingathandanga ukuvezwa igama esithi inengi labo sebesesaba lokuyathatha incwadi zokuphephela ngoba besethuselwa ngokuthi bazabotsha ngoba akulampi elizweni labo.
“Kubuhlungu kakhulu lokhu ukuthi kanti kambe amalungelo oluntu awekho yini eSouth Africa njalo abasinaki. Uthi uyahamba usiya edolobheni kumele uhambe uphethe imali ukuthi amapholisa engakubamba sekumele ubanikeze imali as i bribe yokuthi bakudlulise ngoba bazakubopha.”
Esephendula iziphepheli lezi, isikhulumeli senhlanganiso ye UNHCR unkosikazi Laura Padoan uthembisile ukuthi inhlanganiso yakhe izathintana logatsha lwendaba zasekhaya ukuze kulungiswe izikhalo zeziphepheli lezi.
SAF refugees demonstration
“Siqakathekisa kakhulu izikhalazo zeziphepheli lezi njalo ngiyathembisa ukuthi sizazihambisa kugatsha lwendaba zasekhaya ukuyadinga isisombululo.”
Ugatsha lwendaba zasekhaya belungakaphenduleli izikhalazo lezi, ngesikhathi sisiya emoyeni. Kodwake akukudala umphathintambo wogatsha lwendaba zasekhaya umnumnzana Aaron Motsoaledi etshele iphalamende ukuthi zinengi iziphathamandla zalolu gatsha ezimiswe umsebenzi ngenxa yenkohlakalo kanti ezinye zazo sezixotshiwe, Sekukanengi njalo evela emsakazweni yesizwe ekhuthaza umphakathi ukuthi abike yonke inkohlakalo ahlangana layo.
Your browser doesn’t support HTML5
Udaba lweziphepheli ezitshengisele kweleSouth Africa siluphiwa nguThuso Khumalo