Inhlanganiso ekhankasela ukulondolozwa kwamalungelo oluntu emhlabeni jikelele eyeAmnesty International yethule ugwalo Ngolwesihlanu oluveza ukuthi ukwephulwa kwamalungelo oluntu phansi kombuso kaMongameli Emmerson Mnangagwa kuqhubeka kusiba kubi elizweni. Ithi uhulumende kaMnangagwa ufana xathu lokamuyi uMnu Robert Mugabe.
Esethula ugwalo lolu eHarare ngolwesihlanu, umsekeli kamholi weAmnesty International, eZansi yeAfrica, uNkosikazi Vongai Chikwana usole uhulumende kaMnangagwa esithi uya phambili ngokubopha lokuhlukuluza abantu mahlayana njalo wakhuthaza inhlanganiso yeSADC leyeAfrican Union ukuthi zingenele kudaba lweZimbabwe ukuze amalungelo abantu ahlonitshwe.
Amnesty International
UMongameli Mnangagwa usanda kutshela umhlangano omkhulu weUnited Nations General Assembly eMelika ukuthi uhulumende wakhe usegxilise umbuso okhululekileyo kanye lokuhlonitshwa kwamalungelo abantu eZimbabwe.
Kodwa uChikwana uthi uphenyo lwabo lolu, obeluqathanisa isimo samalungelo oluntu phansi kombuso kaMnangagwa lokamuyi uRobert Mugabe, luveze ukuthi ababili laba zimbila zantabanye.
“Ugwalo lolu lukhangela isikhathi lapho uMongameli Mngangagwa athatha khona amandla. Sibona ukuba uhulumende lowu useyehlulekile ukuguqula indaba zamalungelo njalo uqhubeke ngalokho okwatshiywa ngu Mugabe”
I-Amnesty International ikhuthaze uhulumende kaMnangagwa ukuthi ahloniphe amalungelo, yakhuthaza njalo iAfrican Union leSADC ukuthi zingenele ukuze kuqedwe ukuhlukuluzwa kwabantu eZimbabwe. Lokhu kugcizelelwe ngumkhokheli walinhlanganiso eZimbabwe, uNkosikazi Lucia Masuka.
“Ku Africa Union sibatshela ukuba bakhangelisise isimo samalungelo oluntu. Sikhuthaza ukuthi batshele ele Zimbabwe lilandele umthetho we African Union charter on Human and people”
Umsekeli wesikhulumeli sebandla eliphikisayo eleCCC, uSenator Felix Magalela Mafa uthi bayavumelana lalokho okukhulunywa yiAmnesty International.
Amnesty International
“Liqiniso okutshiwo yi Amnesty International ukuba amalungelo abantu kawasafani lemnyaka lapho kusabusa uMugabe. Ubaba uMnangagwa kahloniphi ilungelo loluntu”
Amazwi kaMafa asekelwe yisikhulumeli sebandla leZAPU uMnu Msongelwa Ndlovu.
“Ngesikhathi engena uMnangagwa ngo 2017 savela satsho ukuba abantu ababebulala amalungelo abantu yibo oMnanaggwa ngesikhathi sika Mugabe. Abantu bebesithi intozodlakela zizaba ngcono babelahlekile”
Kodwa isikhulumeli sikahulumende uMnu Nick Mangwana uthe abakunanzi okukhulunywa yiAmnesty International. Osaphethe umsebenzi wokukhitshwa kwemibiko kubandla leZANU PF uMnu Farai Marapira yena uthi ngamanga akhulunywa yilinhlanganiso.
“Sebekhiphe ugwalo esilwaziyo vele ngoba kabakhulumi qiniso. Bafuna ukuphazamisa isimo sikahulumende. Abakutshoyo kasikulaleli vele. Bakhuluma okwenza bathabise ababathumileyo”
Omunye olwela amalungelo oluntu oseke wahlukunyezwa nguhulumende, uMnu Hebert Chamuka uthi amalungelo oluntu kawahlonitshwa eZimbabwe.
“Umbuso ka Mnangagwa kusukela ngo 2017 kazange enze inguquko. Inguquko ayenzileyo kuphela yikwephula amalungelo oluntu, esibopha ko Mthwakazi, le CCC esifaka emajele”
Ugwalo lweAmnesty International lolu lulesihloko esithi- ‘Zimbabwe-Human rights under attack’.
Inhlanganiso le iphe isibonelo sokubotshwa kwabantu abavalelwa okwesikhathi eside bengavunyelwa lokuthi bakhululwe ngemali yesibambiso, ibail, abafana lowayengummeli weZengeza West epalamende uMnu Job Sikhala owebandla eliphikisayo leCCC, ukwethulwa kwemithetho efana lePatriotic Act lokuhlukunyezwa kwabasekeli bamabandla aphikisayo inengi lawo kungaweCCC.
Ithi njalo ukudutshulwa okwenzwa abantu betshengisela ngo 2018 lokungenela kukahulumende endabeni ezisemithethwandaba ngokunye okuveza ukuba isimo samalungelo abantu asimanga kuhle elizweni.