Abantu bamelele ukuzwa ukuba ibandla leCitizens Coalition for Change lizakwenzani ngokhetho oluqhutshwe kunyanga edluleyo abathi lwatshontshwa nguMongameli Emmerson Mnangagwa leZanu PF.
Bathi akwaziwa lokuzakwethulwa luhlangothi lweSouthern African Development Community olubona ngezomvikela lezombusazwe, olweSADC Troika Organ on Politics and Security, oluhlafune izolo udaba lokhetho oluqhutshwe eZimbabwe enkundleni zokuxhumana.
Umhlangano lo ubukhokhelwa nguMongameli Hakainde Hichilema wakwele Zambia, olobe enkundleni yokuxhumana eyeFacebook ukuba bahlaziye lokhetho oluqhutshwe kwamanye amazwe loluzaqhutshwa kusikhatshana esilandelayo.
Ibandla leCCC lithi kumele kwenziwe ukhetho olutsha kodwa eleZanu PF lithi selidume ledlula ngakho-ke sesifikile isikhathi sokhwakha ilizwe leZimbabwe.
UNkosikazi Barbara Gwangwara, okubandla leCCC, uthi eleZimbabwe kalisoze libuseke ngoba uMnangagwa kangenanga esikhundleni ngendlela eqondileyo.
uGwangwara uthi kumele kuqhutshwe ukhetho olutsha eZimbabwe.
Kodwa uMnu Kuda Munsaka, ilunga leZanu PF njalo okunhlanganiso yeForever Associates Zimbabwe edlelana lebandla elibusayo, uthi uMnangagwa wakhethwa ngemfanelo.
UMunsaka uthi ibandla leCCC kumele likhohlwe ngokhetho olwaqhutshwa ngoNcwabakazi likhangele okubhekane labantu bakwele Zimbabwe.