Izakhamizi zase Victoria Falls zikhala ngokusetshenziswa kwabantwana ngabakumsebenzi wamahotela lendaweni ezamukela izethekeli kungelambhadalo.
Abakulumsebenzi babikwa besebenzisa intsha becatsha ngokuthi babafundisa umsebenzi, qede lapho bengasabaqhatshi.
Lokhu kuvezwe namuhla emhlanganweni oqoqwe ngabenhlanganiso yentathelizindaba, eyeZimbabwe Union of Journalists. Izakhamizi, abakumsebenzi wokuphathisa izethekeli, kanye lababona ngamalungelo abahlali laba bebethe gwaqa ukuzohlaziya inhlupho uzulu wakulelidolobho ahlangana lazo, ngenhloso yokucebisana ngokunganceda ukulungisisa lezi nhlupho.
Isakhamuzi seVictoria Falls, uMnumzana Royal Ndlovu, uqale ngokubuza abaqhatshi ukuba kubangelwa yini ukuba amawotela aqhubeke egqilaza intsha yomango lo kungelambhadalo.
“Silabantwana abayinzalo yalapha, kubo Chisuma, Monde basuka babengo weta kuthiwa baya fundiswa six months engaholi, kodwa kulabanye abasuka kwezinye indawo befike benze umsebenzi munye ngeviki, qede aphiwe umsebenzi. Kuyini okwenzakalayo, besicela lisiphendule kulokho.”
UNdlovu usekelwe nguNkosikazi Siduzile Ngwenya, okhala ngokuthi abantwana abasela kusasa enhle.
“Sicela abantwana beqhatshwe bangene permanent. Owami umntwana sele three years enjalo, sicela indaba le ilungiswe, iphele abantwana bengene emsebenzini beholiswe njalo.”
UMnumzana Kelvin Moyo, obemele inhlanganiso yezakhamizi emhlanganweni lo eyeVictoria Falls Combined Residents Association, uthi kulusizi okwenzakalayo.
“Abazali bakubona kuyinto elihlazo ukuthi abantwana bayasetshenziswa bengaholiswa izimali besebenza kodwa ama companies lawa ekwenzela i-profit, njalo bengabafundisa bebuye bebalahle bayabe besithi bayangaphi ngoba i-tourist hub yi Victoria Falls. Kulokungahloniphani thize ngokuthi abantu bangapha abafundanga abathi yikho bengaphiwa amathuba akuqala ukuthi basebenzele emawoteleni.”
Ephendula kulinkulumo, umholi weEmployers’ Association for Tours and Safari Operators, uveze ukudana ngalokhu ethi basozodla amathambo engqondo, lokhu kuqondiswe. Uthembise ukuthi nxa limizamo ingehlula, uphenyo luzakwenziwa, qede laba baphanyekwe encwadini zobulembu umhlaba ubahlulele.
“Kulamanye amankampani athatha abantwana laba besithi babafundisa umsebenzi okwedlula six months, khonokho ngombono wami akulunganga. Umuntu nxa esebenza njengabanye bonke loba umfundisa, kumele athole imfanelo zakhe laye athole okukuzinakelela, khonokho sizakusa eNEC kuhle kufakwe emthethweni beholiswe ngokwezinga alifaneleyo.”
Eyinye njalo imibuzo ebisegudwini yindaba yenzuzo etholakala emfuleni uZambezi, izakhamizi ezithi kazitholi yona elesikhala evela kumbukiso yempophoma zamanzi le, njalo lentengo yokungena ayifinyeleki.
Eqondisa umbuzo kuMukwasi, uMnumzana Praymore Ncube ucele ukwazi okwenziwa ngamankampani abukisa ngezinyamazana, ikakhulu indlovu ezilindwayo, athi sezibulele abanengi balapha kodwa kungela kucaca okwenzakala ngemva kweziga lezi.
“Eminyakeni edluleyo sibelabantu bakithi bebulawa zindlovu, njenge business community selihambe okunganani ukunqabela lokhu lapha elithola khona lina inzuzo.”
UMukwasi uphendule lumbuzo ethi kuyadingeka ukusebenzelana lezinye ingatsha zikahulumende ekuncediseni engozini ezinje.
“Okunekayo yikuthi kube le continuous learning and assessment isikhathi lesikhathi njalo sile group assurance ukuthi umuntu engafela emsebenzini ebulewe zinyamazana kulemali ephumayo, kodwa nxa elimele sikhangelele iNSSA ukuthi ingene ngoba thina sibhadala bona.”
Ezinye inhlupho ezivezwe kulumhlangano zigoqela ubudlwangudlwangu lenkohlakalo esibhahile ekhansilini yalelidolobho, izakhamizi ezithi yikho okudala ubuyanga kulokuthi zithole lazo ukuphatheka kunotho yaleli dolobho ebuya lezethekeli umuntu wonke asuthe kulokunothisa abavele benothe kakhulu.
Ingcwethi ezicubungula ngezentuthuko zithi kunje izakhamizi sezile minyaka leminyaka zikhala ngamanzi, imigwaqo, iziphala zokubalela zabantwana, lokunye.