Amakhansila eVictoria Falls asekhethe uMnumzana Thuso Moyo ukuba akhokhele idolobho leli kulandela ukuxokozela kukhansili le ngeviki ephelileyo lapho abayale ukukhetho uMnumzana Ephias Mambume, okukhanya ukuthi ubethakazelelwa yinkokheli yebandla leCitizens Coalition for Change, elikhokhelwa nguMnu. Nelson Chamisa.
UMoyo, oleminyaka yokuzalwa engamatshumi amabili lasitshiyangalombili – 28 - uzasekelwa nguMnumzana Lungile Nyoni.
Ukudonselana lokhu, okwaqala ngoLwesibili kuviki ephelileyo, kuphinde kwenzakala njalo namuhla lapho umhlangano obufuze uqale ekuseni uze waqhutshwa seligwaze umhlaba ngesizatho sokungavumelani phakathi kwamalunga eCCC.
Loba uMambume etshele lumsakazo ukuba wayengagxunyekwanga libandla leli ukuba ngusodolobho, umane wafulathela uMoyo loNyoni bengakemukeli lezizikhundla, qede lomgcinisihlalo wesabelo seMatabeleland North kubandla linye, uMnumzana Prince Dubeko Sibanda, laye wenqaba ukuphawula ngokhetho lolu.
Kodwa uMoyo uthi lokhu sekwedlule, okumqoka yikunanzwa kukazulu.
“Sikhangelele ukubana iterm yethu isiyaphela sibesesiqedile indaba yamanzi ngoba yi US$15 million project.
Sesiqalisile njalo sizakwenza imizamo yonke ukukhulumisana lohulumende ukuthi isisize. Okunye esizakwenza njengekhansili yikuvuselela ama sports sibelendlela yokukhulumisana njalo lamankampani aqhatshe abantwana ukuze bengaphatheki kumadrugs.”
UNyoni laye ubona ngesolinye, ethi bazasebenza gadalala edolobheni leli, njalo lokuthi isikhalazo sabo sokuthola inzuzo emfuleni uZambezi sizwakale.
“Sizakwenza lokhu ngokukhulumisana labokholo, inhlanganiso ezizimeleyo labanye ukuze sithole inzuzo ngoba abantu baphila laye uZambezi lo, kodwa kungelanzuzo, ngakho nxa sibalanda sibanengi sesingezwakala.”
UMnumzana Douglas Tshuma, umhlali wakulelidolobho, uthi laba balomlandu wokuletha intuthuko, njalo bebone ukuthi uhlupho lwamanzi luyaxazululwa, lentengo yawo yehliswe.
“Ibill iphezulu, besicela ukuthi bekhangele ukuthi yehle ngoba abantu bayehluleka ukubhadala njalo ikhansili icina iluza ngoba bakhweza kakhulu, so sithi kayehle ukuze wonke umuntu enelise.”
UNkosikazi Qinisani Moyo laye oyisakhamuzi salapha uyakusekela lokhu.
“Sikhangele ukuthi beqhubeke belungisa udaba lwe service delivery ikakhulu indaba yamanzi. Siseduze loZambezi kodwa sesithwelenzima.”
Umgcinisihlalo wenhlanganiso ezimeleyo eyeVictoria Falls Combined Residents’ Association, uMnumzana Kelvin Moyo, ukhuthaza usodolobho lo ukuba engalahli ubuntu bakhe.
“Sekhokhela abadala kulaye loba eliyouth, singabazali bakhe labafowabo, njalo siyabesifuna ukuthi abelesizotha esinike isithunzi ekukhulumeni lekwenzeni yokhe imisebenzi ekhangelelane lekhansilini.”
Isiphathamandla sekhansili le, uMnumzana Ronnie Dube, uthi umsebenzi suzaqala ngemva kokukhethwa kwabazamela inhlangothi zamakhomithi agoqela ezezimali, ezempilakahle, ezokuqhatshwa kunye lezinye.
“Sekwenziwe lokhu sefukuze sifeze esakuphawulayo ku strategic plan document yethu ekhangele kakhulu amanzi, sile project ye WASH, sikhangelele ukuthuthukisa iwater distribution system yethu ukuthi emiinyakeni emihlanu ezayo kufuze sibe sesikuphutshisile lokhu leminye imisebenzi.”
Phezu kwamanzi, izakhamizi zithi akukhangelisiswe njalo imigwaqo, ikakhulu kubo Mfelandawonye, kufakwe izibane emigwaqweni, kubuye njalo kwakhiwe iziphala zolwazi ezigabeni ezimbalwa ukwenzela ukuthuthukisa wabafundi lokunqabela uhlupho lwezidakamizwa.