Kulokukhathazeka phezu kodaba lokubulalana kwezizalwane zeZimbabwe ezisemazweni angomakhelwane, ikakhulu kweleBotswana laseSouth Africa, inkokheli isithi kulesidingo sokuthi abantu bazibambe uma kuqhamuke ukungezwisisani.
Phakathi kweminyaka emibili edluleyo akudluli nyanga kungabikwanga icala loweZimbabwe obulele omunye wakhe kweleBotswana kumbe kweleSouth Africa.
Lokhu sekutshiye inengi lithithibele lizibuza ukuthi kungabe konakelephi, ikakhulu phakathi kwezithandani eziyizo ezihamba phambili kusenzo sokubulalana.
Kuyonale iviki kwele Botswana kulojaha obulele intombi yakhe ngemva kwalokho laye wasezama ukuzbulala ngokuzisika ngengqamu entanyeni.
Kukanti enyangeni ezisanda kwedlulula, emzini weOodi omunye weZimbabwe ubotshwe ngemva kokubulala umngane wakhe wamgqibela kuncwaba elingatshoniyo.
Lezi lezinye izehlakalo zitshiya abeZimbabwe enkundleni zokuxoxisana ezebulenjini ezigoqela oWhatsApp, Facebook lezinye kuzindaba egudwini abantu bedinga ukuthi ludubo lungaqedwa kanjani.
Ommele iZimbabwe kweleBotswana, umnunzana Henry Mukonoweshuro uthi ihofisi yakhe iyathola imbiko yokuthi abantu beZimbabwe bayabulalana ngenani eliphezulu.
“Ngibona ukuthi ngemva kwendaba zeCOVID-19 kunengi abantu ababhekane lazo, ikakhulu bengaphandle kwelizwe njalo kungela abemuli ukubancedisa”
Uthi ihofisi yakhe iyazama ukukhuthaza abantu ukuthi badinge uncedo ikakhulu kumphakathi abahlala kuwo, kukhangelelwe ukuthi bakhatshana lezihlobo zabo.
“Abantu bengakafiki kusinqumo sokuzibulala kumbe ukubulala labo ababathandayo, kabadinge uncedo.”
Umgcinisihlalo wenhlanganiso yabe Zimbabwe kweleSouth Africa, umnunzana Ngqabutho Mabhena uthi labo bathithibele ngezehlakalo, ikakhulu zokubulalana kwabathandanayo.
“Siphakathi kobunzima bokubona abantu bebulalana ikakhulu izithandani, kubangwa ukuthi ubaba kumbe umama uselomunye othandana laye eceleni. Thina sithi uma abantu bengasathandani abehlukane ngokuthula.”
UMabhena uthi imuli kumele zingenele lapho okubonakala ukuthi kule nkinga khona, njalo labezinkonzo bengaphathisa kakhulu.
“Abanye abantu baye bedinga icounselling kodwa bengayifumani. Lezihlobo kazincede uma kulenkinga emtshwandweni kumbe baye hlukane okwesikhatshana ukuze singabi lomonakalo lo esiwubonayo ukuthi izithandani ziyabulalana.”
Ommela inhlanganiso yezizalwane zeZimbabwe kweleBotswana umnunzana Cephas Tshuma uthi isimo abantu abafikela kiso emazweni silakho ukudala ukuthi bacine bebulalana.
“Isisusa yikuthi kulabafika khathesi bezodinga imsebenzi, kodwa kucinwe kuhlalisenwe ngenxa yokusilela kwemali. Omunye acine ebona engathi usethethe kumbe usethethwe. Omunye angabona intombi kumbe ijaha phandle, sokusuka kuhluphe.”
Unkosazana Sindiso Sibanda uthi ukuswelakala kwemuli eduze kungabe kudala ukubulalana kwabeZimbabwe emazweni angaphandle, ngoba kungela malume kumbe ubabakazi ongabeluleka.
“Nxa kuyinto eyenzeka isikhathi sonke, ukwehlukana kuhle, ngoba ingane ziyasalwa zikhangelwe ngubani uma bebulalana.”
Kulokwesabela njalo ukuthi labo abangalamaphepha bayesaba ukufinyelela usizo oluphiwa nguhulumende olokwelulekwa nxa bengabhakana lenhlupho ezinje.
Emazweni afana leBotswana, kulodubo lokuthi ilizwe libhekane lokubulawa kanye lodlakela olubhekiswe kwabesifazane olwe Gender Based Violence, kulokunakanela ukuthi mhlawumbe abeZimbabwe bafike bathathe umkhuba wesizwe abafikela kiso.
Your browser doesn’t support HTML5
Udaba lokubulalana kwabeZimbabwe kwamanye amazwe siluphiwa nguMqondisi Dube