Uhulumende uthi akaboni okwaphanjaniswa yikhomishini ebona ngezokhetho eyeZimbabwe Electoral Commission, ngoba isebenze ilandela imithetho yelizwe okungabe kungaphathanga kuhle abenhlanganiso eyeEuropean Union, asebemisa ezinye inhlelo abaziqhuba leZEC.
Lokhu kuza ngemva kwenyathelo elithethwe ngabe EU abazise ukuthi sebemisa usizo obekumele luphiwe kwabe ZEC olokuphathisa umsebenzi wokuqhuba inhlelo eziphathelane lokhetho.
Embikweni wabo, abeEU bathi bathethe lesinqumo ngenxa yendlela iZEC eyaqhuba ngayo ukhetho ngoNcwabakazi.
Kodwa umqondisi obona ngezokukhulumisana labakwamanye amazwe kugatsha lokwethulwa kwemibiko, uMnumzana Richard Mahomva, uthi iZEC isebenze ilandela imithetho yelizwe njalo uhulumende akaboni lapho eyaphosisa khona.
“Kuqhubeka kuveza obala ukuthi bebelendlela abekade befuna ukuthi ukhetho luphume ngayo kodwa akuphumanga ngaleyondlela. Kodwa esikubonayo njalo ngalokhu kutshengisela ukuthi iZEC iyenelise ukuthi ikhombe ukuthi iyinhlanganiso elokusebenza ilandela iConstitution yelizwe lethu okokuthi imali evela phandle kayenzi intshintshe izinqumo zayo.”
UMnumzana Farai Marapira, osaphethe isikhundla sokuba ngumqondisi obona ngokwethulwa kwemibiko kubandla leZanu PF, uthi kalitsho lutho kibo inyathelo labe EU.
“I-ZEC yinhlanganiso eyasungulwa phansi kwesisekelo sombuso ngalokho ke, ithola imali ivelela kuhulumende. Asikaze sithembele kuEU ukutholisa iZEC imali. Ngakho-ke, empeleni, ukwehla kwezimali zabo akuyona indaba yalutho njalo okungabhalwa ngayo, akukho okungalotshwa ngakho kiyo. Kasilandaba lakho lakancane.”
Kodwa isikhulumeli sebandla eliphikisayo eleCitizens Coalition for Change, uMnumzana Promise Mkhwananzi, uthi bayalincoma njalo bavumelana lenyathelo elithethwe ngabe EU.
“Siyamangala actually ukuthi bebevele befaka imali kuZEC ngoba iZEC ayikho ready, ayilama-institutions owokuthi imali leyi izasebenza kuhle endleleni okumele isebenze ngayo njengobufakazi obukhona esabubonayo ngesikhathi sokhetho. I-ZEC yehluleka ukwenza umsebenzi wayo totally okubangele ukuthi iEU ikhiphe imali yayo ekade ibancedisa ngayo, ngoba injongo yemali ibingeyokuthi iZEC incediswe ukwenza ukhetho oluqondileyo oluzakhipha umkhokheli oqondileyo ofunwa nguzulu weZimbabwe kodwa hayi ke, lokho akwenzakalanga.”
UMnu. Effie Dlela Ncube, owenhlanganiso ebona ngezamalungelo abathengi eye-National Consumer Rights Association, uthi ukuxabana labe EU ngalesi sikhathi akusoze kusize eleZimbabwe.
“Amazwe lamazwekazi lezindawo ezihlanganisa amazwe ezinjengabo EU, ziyanceda kakhulu ekuthini ilizwe lakithi livuse umnotho walo ngokuba siphakathi kobunzima obukhulu. Okukhulunywa yiEU yikuthi ukhetho aluzange lwahambisana leConstitution lemithetho yeZimbabwe, belungakhululekanga ngokunjalo ngeke baqhubeke bencedisa iZEC khona isimo sime ngaleyondlela. Okudingakalayo yikuthi kulungiswe khonalokho iEU ekukhulumayo ngokuba phela kayikhulumi ngemithetho yayo, ikhuluma ngemithetho eyeZimbabwe. Kodwa ke lokho okweZimbabwe ukuthi kayilandaba loncedo lweEU, kuzakwenza ukuthi singene esizini olukhulu kakhulu kulalokho esikukho lamuhlanje.”
Kodwa umsekeli kamgcinisihlalo wenhlanganiso yeZEC le, uCommissioner Rodney Simukai Kiwa uthi inhlanganiso yakhe isebenza izimele njalo uhulumende ubatholisa konke abakudingayo ngesikhathi.
“Abe-EU nxa kuyikuthi khona kabasafuni, ngokwabo imali ngeyabo, singathini thina. Ngokwabo lokho kodwa thina siyakwazi ukuthi khona akulalutho ngitsho olulodwa esizayehluleka ukulwenza ngenxa yokuthi kuthiwa abeEU sebethe bona asisabambisani sonke, akusethusi thina lokho. Uhulumende uyasinika konke esikufunayo.”
AbeZEC bagcizelele elikahulumende elithi lilungelo le-EU, ukuthatha lelo nyathelo.