UMongameli Emmerson Mnangagwa utshele umhlangano weUnited Nations ngoLwesithathu ukuthi uhulumende wakhe usethuthukise kakhulu umsebenzi wezempilakahle lanxa nje abanengi bekhala ngokuthi akulamithi ezibhedlela.
Ekhuluma emhlanganweni wePandemic Prevention, Preparedness and Response, owokucebisana ngokungenziwa ngabakhokheli bamazwe omhlaba ukuze kwenqatshelwe imikhuhlane efana loweCovid-19, uMnangagwa uthe eleZimbabwe lizilungiselele ngokugcweleyo ukumelana yiloba yiwuphi umkhuhlane.
Wengeze wathi uhulumende wakhe uqinise ezempilakahle kanti futhi uthi ilizwe lakhe lizakwenelisa ukugcwalisa iziqondiso zokunqoba umkhuhlane weHIV/Aids.
“Ngemva komkhuhlane weCovid-19 eleZimbabwe seliqinise imisebenzi yalo yezempilakahle... ngesikhathi sobhubhane lweCovid-19 sisungule njalo inkampani elungisa umoya we-gas,” kutsho uMnangagwa.
Ukhuthaze njalo abakhokheli bamazwe atshiyeneyo omhlaba ukuthi basebenze ndawonye ukuze kwenqatshelwe imikhuhlane eyingozi elakho ukuqhamuka efana le-coronavirus.
Uthe, “Ngikhuthaza inkokheli zonke ukuthi zithathe amanyathelo aqinileyo, sifunde kulokho esikubone weCovid-19 ukuze kuvinjwe imikhuhlane enje.”
Abebandla eliphikisayo eleCCC bathi uMnangagwa kakhulumi qiniso nxa esithi umsebenzi wezempilakahle uhamba kuhle eZimbabwe ngoba ezibhedlela akula mithi lemitshina yokusebenzisa.
“I-Zimbbwe khathesi ithwele nzima, isenkingeni," kutsho uMnu Tim Muringai oweCCC eMelika. "Nxa sikhangela ezibhedlela sasililizwe elalihamba phambili kakhulu kundaba zokulolonga odokotela lokwelapha abantu nje jikelele, kodwa konke lokho akusekho."
Amazwi kaMuringai agcizelelwe ngolwela amalungelo oluntu uMnu Mbuso Fuzwayo, okhokhela inhlanganiso yeIbhetshu likazulu.
"Angikhohlwa ukuthi iHIV izaphela ngoba ubuyanga bungaqansa abantu abaphila ngokuthengisa imizimba labo bazakhwela,” uMnu Fuzwayo utshele umsakazo weStudio 7.
Kodwa Ilunga leZanu PF uMnu Believe Gaule uthi amqotho amazwi kaMnangagwa.
Uthe, “Kuqondile ukuthi uMongameli akubeke ngaleyo ndlela, ngoba liyananzelela ukuthi umnotho wethu awumanga kuhle… yebo siyasilela lapha lalaphaya kodwa uhulumende wenze konke akwenelisayo.”
UMnangagwa uzakwethula umbiko wakhe omqoka emhlanganweni omkhulu weUnited Nations General Assembly phambi kwabakhokheli bamazwe omhlaba ngoLwesine lapho akhangelelwe ukukhuthaza eleMelika ukuthu lesule izijeziso elamethesa zona labanye bakhe kubandla leZanu PF ngoba esithi zilimaza uzulu makhaza.
UMongameli Cyril Ramaphosa weleSouth Africa loMongameli Hage Geingob wakweleNamibia labe sebethule inkuthazo efanayo emhlanganweni munye.
Your browser doesn’t support HTML5
Udaba Siluphiwa nguNtungamili Nkomo