Kuqhamuke ukuphithizela ekhansilini yedolobho le Victoria Falls izolo kusihlwa lapho izakhamizi labanye abasekela ibandla le CCC abatshengisele khona ngesizatho sokungasuthiseki ngokubekwa kukasolobho abathi ukhethwe yinkokheli yalelibandla ikanti izizalwane zona zisithi zifuna oyinzalo yalapha. I-CCC yathola izihlalo ezilitshumi lanye, 11 phakthi kwezilitshumi lane, 14, kulelidolobho.
Umvukela lo uze ngemva kombiko kasodolobho, uMnumzana Ronnie Dube, obethulele linkundla ukuba ukhetho luzaqhutshwa njani ngokusemthethweni.
Engakaginyi lumbiko ngokupheleleyo, umane wavinjwa ngelinye lamalunga eVictoria Falls Combined Residents Association –VIFACORA, uMnu. Trymore Ndolo, omgame ngelokuthi ukhetho kalusoze luqhubekele phambili ngesizatho sokuba ibandla leli belithume umsekeli kasodolobho wakoBulawayo, uMnumzana Donaldson Mabutho ukuzokwethula umbiko wokuthi amakhansila wonke ebandla leli avotele uMnumzana Ephias Mambume esikhundleni lesi.
Imane yamemetheka lapho indaba, qede kwatshaywa amatafula, kwaphoselwana amazwi aqatha, kuhlatshelwa njalo izingoma zokumisa lolukhetho kwaze kwasukuma uDube kanye lezisebenzi zekhansili le, amakhansila baqoqa okungokwabo bafulathela.
Umsakazo lo uxoxisane loMnumzana Joe Muff obengomunye walaba. Uchasisa isizatho sokutshengisela kwakhe.
“Sifuna abantu abahloniphayo, abayinzalo yalapha, njalo umuntu ozakwazi amasiko alapha. Besikhangelele ukuthi umayor abengumuntu oyinzalo yalapha. Babuyile kodwa abazi lutho, abasoze behloniphe njalo bazaqhatsha abantu babo,”kutsho uMuff.
UNkosikazi Judith Nyoni laye wethula esakhe izizatho: “Esikubonayo yikuthi laba bengakhethwa uzwa sekuthiwa balabhawa, amahotela lakho konke ngoba abalandaba labantu balapha, thina vele uMambume kasimfuni lobakutheni.”
Umngcinisihlalo we VIFACORA, uMnumzana Kelvin Moyo laye uchasisa kabanzi ngotshengiselo lolu.
“Ngokuzwa, izakhamizi zithi bezifuna umuntu othile, yikho okucine kwenza ama residents athi asivumelani lento le esiyizwileyo ukuthi lina lifuna ukukhetha ubukhokheli esingavumelani labo.”
Loba kunjalo, uMoyo ukhala ngokuthi imisebenzi kukhansili le izaphazamiseka.
“Into okumele zilungiswe ezihlanganisela amanzi, isewer zizaphuza ukuthi zikhangelwe ngoba ama councilors asebenza njengama policy makers kusame beme, kodwa udubo lwamanzi lusazoqhubeka ngokuswela usodolobho lo.”
UMnumzana Herbert Ncube, ongumgcinisihlalo wenhlanganiso ezimeleyo, iHwange Residents Association, laye uqina ngelokufuna inzalo yalapha.
“Sikhuluma kunje asilamanzi, singefaka umuntu ongasuye walapha, bazazenzela santando kungathengwa imitshina esifile ngoba bengelandaba labahlali balapha,”kutsho uNcube.
UDube uthi kulusizi okwenzeke izolo.
“Kulusizi ukuthi sehlulekile ukukhetha, kodwa kulusizi olukhulu futhi ukuthi izifiso zabantu zingalandelwa, kungasenani sizabeka elinye ilanga lokuthi siluqhube lolukhetho ngoba nxa kunje ikhansili ayisebenzi ngendlela eqondileyo,” kutsho uDube.
Imizamo yokuxoxisana labebandla le CCC ngalesisehlakalo yehlule, loba kade belapha ngoba beveze ukuba kabakabi semandleni okuphawula imbono yabo.
Ukutshengisela lokhu kumiswe yikungenela kwamapholisa.
Your browser doesn’t support HTML5
Udaba Silethulelwa Ngu Nokuthaba Dlamini.