Izakhamizi zakoBulawayo sezamukele inyathelo likaMeya walelidolobho omutsha uMnu David Coltart yena uthi kafuni kuthengelwa imota yomsebenzi yikhansili, esithi imali ekhona kumele ihanjiswe kunhlelo zikazulu ezifana lokuthenga izimota ezithwala izigulane, ama-ambulances kanye lezithwala izibi.
UColtart, olilunga lebandla eliphikisayo eleCCC, utshele umhlangano awenze lenhlanganiso ezizimeleyo izolo ukuthi uzaqhubeka esebenzisa imota yakhe avele elayo.
Uthe idolobho lakoBulawayo lidinga ama-ambulance angamatshumi amathathu, 30, kodwa okwamanje lilamahlanu kuphela.
Izimota ezithwala izibi ziyisithupha kanti ezicitsha umlilo zona zine kuphela.
Ngokunjalo, uMnu Coltart uthe ngeke avume ukuthi umasipala adlalise imali emthengela imota khona kulendingeko zikazulu eziphuthumayo.
Lokhu kwamukelwe ngenjabulo yisiphathamandla senhlanganiso yeBulawayo Progressive Residents Association uMnu Thembelani Dube.