Ngesikhathi amazwe amanengi, ikakhulu asathuthukayo ethatha ithuba lomhlangano omkhulu wamazwe omhlaba oweUnited Nations General Assembly ukukhanga abangazotshala imali lokusungula amabhizimusi, ingcitshi ezicubungula ezomnotho lezombusazwe, zithi uhambo luka Mongameli Emmerson Mnangagwa kalusoze lulethe izithelo ngenxa yendlela ilizwe leli eliqhube ngayo ukhetho olwenziwe ngoNcwabakazi.
Inengi lamazwe womhlaba livame ukuqoqa imihlangano ngesikhathi kuqhutshwa umhlangano omkhulu oweUnited Nations General Assembly okubonisana ngendlela angaqinisa lokuvuselela imisebenzi yokuthuthukisa ezomnotho, ukuthengiselana lokunye.
Njengomzekeliso eleSouth Africa lithethe ithuba lokuhlangana lele Melika ngenjongo yokukhulumisana ngendlela amazwe la angaqinisa ngawo ezamabhizimusi.
Ingcitshi ezicubungula ezomnotho zithi eleZimbabwe kalilalo ithuba lokwenza okufanayo lamanye amazwe ngenxa yendlela eliqhube ngayo ukhetho. Zithi kulakho ukwenza ukuba abamabhizimusi bakwamaye amazwe bengalithembi leli lizwe.
Eyinye yalezi ngcitshi nguMnu. Kudakwashe Zulu, esebenza izimele, othi udaba lokhetho lweZimbabwe lwenza uhambo luka Mnangagwa kwele Melika lube yize nje.
"Akula mabhizimusi akhona. Angaze ahambe akulanto azayenza ngoba bafuna ukuba kube lotshintsho. Ngabe uyavuma ukusebenza labanye ngoba bazamkhangela nje kungela ncedo abazamnikeza lona.”
Lokhu kusekelwe nguMnu Hebert Chamuka, osebenzelana lebandla lePeople's Union of Zimbabwe. Yena uthi amazwe amanengi kawamethembi uhulumende weZimbabwe okwenza lezamabhizimusi zibe nzima.
"Akuncedi ukuya ku UN kuka Mongameli. Ngoba kanqobanga kukhetho. Watshontsha amavoti. ISADC, AU le UN bayakwazi ukuthi angeni kulumhlangano. Kumele aqale eqede udaba lwakhe lukutshontsha amavoti."
Kodwa lokhu kuphikiswe nguMnu. Teddy Ncube, ingcitshi kwezombusazwe esebenza kunhlanganiso eyeLeaders for Africa Network, othi uhambo lolu luqakathekile kakhulu.
"Okuqakathekileyo yikuthi uMongameli usukumile ukuyahlangana lenkokheli yamanye amazwe ngoba lokhu kuyanceda ukuletha imali kuleli ekhuluma labo World Bank lezinye inhlanganiso.”
UMnu Farai Marapira, obona ngokwethulwa kwemibiko kubandla leZanu PF, othi uhambo lolu luzakwenza uMongameli Mnangagwa athole ithuba lokuchasisa izifiso zikazulu weZimbabwe kwele Melika.
"Njengoba sisazi ele Zimbabwe alilasitha njalo livulekile kwezamabhizimusi. Lesi yisikhathi sokuthi uMongameli ayisivumelela amathuba njenge lizwe. Umhlangano lo uqakatheke kakhulu ukuthi sitsho esilakho njenge ZImbabwe. Sizatshengisa ukuba sizimisele ukusebenza labanye. Sizaletha amabhizimusi amanengi kuleli ngalumhlangano.”
UMongameli Mnangagwa ufike eNew York kwele Melika namuhla njalo ukhangelelwe ukuba uzakhuluma emhlanganweni oweUnited Nations General Assembly ngoLwesine.
Umhlangano walonyaka oweUNGA, ongenwa yinkokheli yamazwe womhlaba kumbe abameli babo, wenziwa phansi kwesihloko esithi ‘Rebuilding Trust and Reigniting global solidary; accelerating action on the 203o agenda and its suistainable development goals towards peace, prosperity, progress and suistainability for all’