Namuhla kufungiswe amakhansila alitshumi lambili lengxenye -26 azamela uzulu wemaphandleni kukhansili yeHwange Rural District Council ngesikhathi izakhamizi zalumango zikhala ngesimo sobunzima bempilo kanye lokusilela kwezentuthuko ezigoqela imigwaqo, izikolo, amakilinika kanye lamadibha.
Amakhansila la athi inhloso yabo yikusebenzisana lekhansili le lezinye inhlangothi zikahulumende lenhlanganiso ezizimeleyo ukuzama ukwehlisa izinga lobumpofu kuzakhamizi zemaphandleni.
Bathi bahlose njalo ukukwenza lokhu ngokuletha inhlelo ezitshiyeneyo ezizadala imisebenzi ikakhulu kolutsha.
Omunye wabafungisiweyo emele iMilonga Village kuWard 6 ngaphansi kwebandla leCitizens Coalition for Change, uNkosikazi Nolea Gumede, uthi kunhlelo lezi, okwakhe kuzaba yikufundisa intsha yesifazane ngokuqakatheka kokwazi amalungelo abo.
"Njengomama, ngizasebenza lolutsha ngibatshela ngokubaluleka kwezemfundo, Abesifazane labo njalo bethole inhlelo zemisebenzi yezandla."
UNkosikazi Sikhanyiso Moyo, ongene ngohlangothi lwabomama iWomen’s Quota esigabeni seChisuma kubandla linye, laye uthi uhlose ukuletha inhlelo zokuphakamisa abasifazane kanye lokubakhuthaza ngezokuzisebenzela.
Kwezentuthuko egoqela uzulu wonke jikelele kuzigaba zonke lezi, uMnumzana Peggie Africa Ncube, ongene ubukhansila lobu ngaphansi kwebandla leZanu PF, uthembisa ukwakha amadibha kanye lekilinika eMashake.
"Chikandakubi, akula kilinika, njalo imigwaqo layo ifile."
UMnumzana Bonginkosi Moyo, omele isigaba seChidobe Ward, uthi phezu kwalokhu, ufisa ukuletha inhlelo zokunqotshwa kwendlala edala yikuguquka komkhathi - iclimate change. Wazisa ukuba imizi eminengi kundawo le ikati selilala eziko.
Inhloso yakhe njalo yikusondeza amanzi kuzakhamizi.
Kodwa ozamela iKachechethe Ward ekubandla leMDC-T, uMnumzana Givemeagain Moyo, uthi okusemahlombe abo kukhulu. Ugcizelela esithi okokubandlululana ngomhlobo webandla sekufuze kubekwe nganeno.
Isiphathamandla sekhansili le, uMnumzana Phindile Ncube, utshele lumsakazo ukuba ngemva kwezifungo, amakhansila la azafakwa ezifundweni zokwazi umsebenzi eziwukhethelweyo kusukela kusasa kusiyabamba uLweSithathu.
Kunani lamakhansila la, inengi labo lidabuka kubandla leZanu PF leCCC, kuthi oyedwa edabuka kubandla leMDC-T lomunye njalo oliqembu elizimeleyo.
KuWomen’s Quota, abayisithupha bakhethwa ukumele ilungelo labasifazana emaphandleni agoqela iDete, Mabale, Makwandara, Nemanhanga, Kamativi lezinye.
Your browser doesn’t support HTML5
Udaba Lokugcotshwa Kwamakhansila eHwange