Asethwele amagabha avuzayo amalunga ebandla leCitizens Coalition for Change athi abotshwa mahlayana ngamapholisa.
Omunye wababotshwe namuhla nguNkosikazi Fadzai Kadzombe, umsekeli kameya weHarare.
Sebefika phose itshumi ababotshwe ngamapholisa abakubandla leCCC, abetheswa amacala ahambelana lokhetho oluqhutshwe ngoNcwabakazi.
UNkosikazi Kadzombe, owetheswa icala lokutshaya ilunga leZanu PF ngesikhathi sokhetho, ubotshwe namuhla njalo ukhangelelwe ukuba uzamiswa emthethwandaba kusasa. Amagqwetha akhe athi uyaliphika icala leli. Amanye amalunga ebandla leCCC asanda kubotshwe nguPatrick Cheza labanye bakhe abane eGoromonzi, uMnu. Givemore Marovha ohlala eSeke labathathu abetsheswa abacala okukhahlameza amalunga ebandla elibusayo ngesikhathi sokhetho.
Kulabanye njalo eHarare, abagoqela ukhansila Clayd Mashozhera loDavid Jessup abevelelwe enkambeni yamapholisa, okuthiwa babefuna ukubulala ilunga leZanu PF ngesikhathi sokhetho. Ibandla leCCC lithi abantu bonke laba babotshelwe ize.
Isikhulumeli samapholisa uAssistant Commissioner Paul Nyathi uthi basahlolisisa amacala etheswa abantu laba. Isikhulumeli sebandla leli, uMnu. Promise Mkhwananzi uthi kuyayangisa okwenziwa ngamapholisa.
UMnu. Rejoice Ngwenya, ingcwethi kwezombusazwe okunhlanganiso yeCommon Market for Liberation Solutions, uthi akuqedakali okwenziwa ngamapholisa lemandla elibusayo.
UNgwenya uthi amalunga eCCC athwaliswe nzima ngoba ibandla labo liphikisa impumela yokhetho oluqhutshwe ngoNcwabakazi.
UMnu. Witness Dube, okubandla leZanu PF okhuluma ezimele, uthi ibandla leCCC seliphelelwe ngumphako.
Ibandla leCCC lithi ukhetho kumele luphindwe ngoba kaluqhutshwanga ngemfanelo.