UMnu. Mphathiswa Ncube, owebandla leZanu PF ongukhansila kaWard 18 eGwanda South, usekhethwe ukuba ngumgcinisihlalo weGwanda Rural District Council, esabelweni seMatabeleland South.
Ukhetho lolu lwenziwe kulandelwa iziqondiso zemithetho yemadolobheni lezabelo.
Impumela yokhetho lolu oluqhutshwe ngoLwesithathu yethulwe nguMnu. Thulani Moyo, obemele usikomitshi wesigaba seGwanda.
"Silebizo okuthiwa nguStanford Nkala uthole 12 votes sizokuba lebizo okuthiwa nguMphathiswa Ncube uthole 19 votes ngokunjalo uMphathiswa Ncube nguye obangumgcinisihlalo weGwanda Rural District Council."
Amakhansila bavotele umkhokheli wekhansili yeGwanda omutsha eGwanda ngoLwesithathu.
UNcube uthi bazasebenza ndawonye bengamakhansila ukuze bathuthukise impilo yabahlali bemaphandleni.
"Siyasilela kudevelopment yikho engikhangela khona kakhulu nxa sithuthukisa izindawo zethu, imigwaqo,indaba yamagetsi lenetwork sisasalele emva ngakho sisebenza ndawonye lezakhamizi ngibona kuzasihambela kahle."
Sixoxe njalo loMnu. Stanford Nkala, ukhansila kaWard 1 eGwanda North, obencintisana loNcube.
"Izikhathi ezinengi nxa kusenziwa ukhetho lukamgcinisihlalo ibandla eliyabe lilenani labantu abanengi yilo elithola lesisihlalo akuyadanga ukuthi bakhangele ukuzimisela lomuntu okunye okusuke kwasiphambanisa yikuthi ibandla lethu liyehlulekile ukuhambisa amabizo okutsho ukuthi abeZanu PF bangene bengaphikiswanga."
Councilors holding a meeting at the Gwanda Rural District Council
Ukhansila kaWard 10, uMnu. Mandlenkosi Moyo, ukhethwe ukuba ngumsekeli kaNcube. Osakhulayo ukhansila Linda Moyo, oleminyaka yokuzalwa engamatshumi amabili lambili – 22 okhethwe phansi kwe-women's quota uthi kuyabajabulisa njengabatsha ukuthi labo sebephethe intambo zombuso.
"Isikhathi esinengi uyathola ukuthi omama abenelisi ukuthola izikhundla kwezombusazwe ngoba obaba abanengi bethola ukudlula omama, lelithuba lihle kakhulu njalo siyabonga ukuthi njengabomama singenile."
IGwanda Rural District Council ilamakhansila angamatshumi amathathu lanye -31 njalo abangamatshumi amabili lane -24 ngabavotelweyo kuthi abayisikhombisa bangene ngewomen's quota.
Kusenjalo, umeli wedale lephalamende eGwanda North, uMnu. Desire Nkala owebandla leCCC labanye abathathu akade besetheswa umlandu wokudabula amagwaliba kaMongameli Emmerson Mnangagwa okukhankasela ukhetho mhla zinhlanu kunyanga edlulileyo, batholakale bengelacala ngoLwesithathu.
UMantshi uCharity Maphosa, esethula isinqumo sakhe, uthe akulabufakazi obukhomba ukuthi abane laba badala lelicala.