Lanxa amapholisa elomlandu wokulwisana lokusetshenziswa kwezidakamizwa osokugxile impande eZimbabwe, amanye awo kanye lamasotsha abikwa esebenzisa lezizidakamiswa ngobunengi.
Lokhu kuphume emhlanganweni wengcwethi zezempilakahle kunhlangothi zikahulumende ezehlukeneyo osungulwe ngoMvulo eVictoria Falls wagqitshwa namuhla.
Umhlangano lo ubungowokuxoxisana lokucebisana ngodubo lokusetshenziswa kwezidakamizwa, osokubhahe eZimbabwe yonke jikelele, ikakhulu kwabasakhulayo.
Lanxa kungelamanani abambekayo aveziweyo ngamapholisa lamasotsha asebenzisa izidakamizwa, omkhulu weManyame Air Base Hospital, uDokotela Jones Mombeyarara, ukhuthaze inhlangothi zikahulumende ukuthi zithathele amanyathelo abezomvikela laba abasebenzisa okudakayo esithi sebesehlisa izinga lokuqhutshwa komsebenzi.
Umhlangano lo utshelwe njalo ukuthi emajele sokugcwele abantu ababulawa ngumkhuhlane wengqondo ngenxa yezidakamizwa kanye lokuthi intsha esukela kuminyaka elitshumi lanhlanu, 15, kusiya kwengamatshumi amathathu lanhlanu, 35, yiyo ephatheke kakhulu kuloludaba, osokudale ukuthi inani labagula umkhuhlane wengqondo likhuphuke ezibhedlela.
Esipha umzekeliso wezibotshwa eziseChikurubi Maximum Prison eHarare, umqondisi omkhulu wezempilakahle kulelijele, uMnumzana Evidence Gaka, uthe sebesedlula amakhulu amahlanu abalaliswe kulindawo, okulinani athe seliqonge kakhulu.
“Okwenzakalayo endaweni lezi yikuthi siphila labodadewethu labafowethu asebephambaniseka ingqondo, imuli zathi zikubona sekunjalo zadinwa zabaletha kithi ngesikhathi lathi singelanzuzo eneleyo. Sikhuluma kanje, iChikurubi ithwele abedlula 500, yona ifuze ingedluli inani le 150. Asambeni phandle siyekhankasela ukwehlisa lokhu.”
Amazwi kaGata agcizelelwe ngobona ngezamajele esigabeni seChinhoyi, uNkosikazi Tendai Mushariwa, yena othe udlakela solubhahile emajele ngenxa yabagula umkhuhlane wengqondo.
“Babalodlakela kakhulu kwezinye izibotshwa, njalo lokudla bayala okucina kudala ukuthi bebeliminye imikhuhlane kanye lokuzaca kwemizimba.”
Ekhuluma emhlanganweni munye, obona ngezempikahle kukhansili yeVictoria Falls, uMnumzana Michael Ncube, uthe kulophenyo oluveza ukuba izidakamizwa sezigxilile lakulelidolobho.
“Uphenyo lolu lwaboniswa ukuthi phose ezitaradeni zezindlu eziyi 40 kungaphose kubelabantu ababilu okuthiwa ngama addicts, laba abangasakwanisi ukuphila ngaphandle kwezidamizwa. Sinanzelela njalo ukuthi manengi nje amadrugs asetshenziswayo ahlanganisa ombanje, o crystal math silabanye njalo ezniwa nge orange crush ihlangene le-cerevita.”
Obemele amapholisa, uSuperintendent Edmore Runganga, uthi izidakamizwa ezisetshenziswa kakhulu zigoqela ontshengu, imbanje, icrystal meth kanye lomuthi wokukhwehlela.
“Lokhu kubangelwa yizimpi zemidenini, ukudideka kwengqondo, ukuyengwa kanye lokuzikholisisa ecansini kanye lokungaphatheki emsebenzini.”
Ukuze kwehliswe udubo lolu, ingcitshi lezi zihlomisane ngendlela ezehlukeneyo ezingathathwa. Nangu njalo uNcube.
“Kulesidingo ukuthi sibelama rehab centres abakhonapha eVictoria Falls ngoba icost ye-rehabilitation liphezulu, ngokwesibonelo, ngenyanga kubiza US$400 kusiya ku US$850 njalo labasebenzisa ama drugs la bavela emizini empofu kanti ubuhlungu bakhona yikuthi laba basuka bephambanise umnotho wendlini.”
Amapholisa athi kusukela ngenyanga kaNhlolanja kusiyabamba uMabasa, abophe abantu abedlula inkulungwane eziyinkulungwane - 6,156 abathengisa izidakamizwa lezi, njalo babutha inani lamadola akuleli eledlula izigidi zenkulungwane ezine, 438 million.