Abaphatheke emdlalweni kakhilikithi babuthane bevalelisa owayengukaputeni owaphinda njalo waba ngumqeqetshi weqembu labesilisa elimela iZimbabwe emdlalweni kakhilikithi, uHeath Streak, emkhosini oqhutshelwe koBulawayo ngoLwesihlanu.
Isiphathamandla senhlanganiso yeZimbabwe Cricket esisebenze kakhulu loStreak, uVumindaba Moyo uthi umuyi wayelesipho esimangalisayo kwezemidlalo.
Vumindaba Moyo
“Undoda lowana ithalenta lakhe lalimangalisa kakhulu. Wabakhona kuqembu lezikolo ebelimela ilizwe emdlalweni werugby, wenza izimanga kumdlalo wejavelin ikanti lomdlalo wenguqu ubewudlala ngesikhathi efunda esikolo seFalcon. Ukhethe ukudlala umdlalo kakhilikithi ngenxa yokuba uyise ubeyingxenye yeqembu leOld Miltonians obekuliqembu ebeliqine kakhulu ngalezonsuku idolobho lakoBulawayo lisahamba phambili emdlalweni lo. Udlale umdlalo owodwa owezinga laphezulu wahle wabizwa kuqembu lesizwe njalo sonke esilandela umdlalo kakhilikithi siyakwazi ukuba ube ngumdlali olodumo emhlabeni wonke jikelele. Akuvamanga ukuba kweleZimbabwe kutholakale abadlali abaduma umhlaba wonke kodwa kulesikhathi lapho obengomunye wabadlali abalitshumi abahamba phambili ekuphoseni ibhola emdlalweni wohlobo lweTest. Ucine futhi esesaziwa njengomdlali owenelisa konke ukuphosa ibhola kanye lokulitshaya,” kutsho uMoyo.
Okhokhela umdlalo kakhilikithi edolobheni lakoBulawayo uNicholas Singo uthi umuyi udlale indima enkulu ekutheni lumdlalo usabalale udlalwe endaweni ezitshiyeneyo zelizwe.
Nicholas Singo
“Kwakusiphathisa thina njengabaqeqetshi abasebenza labantwana abahlala emalokitshini ahlala abanengi ukuthi silethe umuntu owayengukaputeni waphinda njalo waba ngumqeqetshi weqembu lesizwe ukuba azobafundisa ukudlala umdlalo kakhilikithi njalo ebafundisa ngolimi lwabo. Silahlekelwe kakhulu,” kutsho uSingo.
Odlale loStreak waphinda waqeqetshwa nguye kuqembu lesizwe uChristopher Mpofu uthi ukutshona kwakhe kumzwise ubuhlungu kakhulu.
Christopher Mpofu
“Ubengumlungu ngejwabu kodwa mina bengimbiza ngisithi ngumlungu omnyama. Ubumthola elobaba wakhe behlezi bekhuluma isiNdebele okungokunye okwangenza ngaba lothando laye ngoba kimi kwangiphathisa kakhulu njengoba emdlalweni kakhilikithi kuvame ukukhulunywa isikhiwa kodwa konke engangikufuna ngangibuza kuye angichasisele ngesintu. Ukufa kwakhe kungizwise ubuhlungu kabi njalo ngiyazi kulabafana abancane abanengi abafunde okunengi kuye uStreak,” kutsho uMpofu.
UStreak uqale ukudlalela iqembu elimela iZimbabwe emdlalweni kakhilikithi ngomnyaka ka1993 njalo ukhethwe ukuba ngukaputeni ngomnyaka ka2000.
Ekumeni kwakhe ukudlala uqale ukuqeqetsha njalo uke waba ngumqeqetshi weqembu lesizwe eleChevrons.
UStreak utshone ngeSonto ekuseni ngemva kokuba egule okwesikhathi ephethwe ngumkhuhlane wemvukuzane.
Ubeleminyaka engamatshumi amane lathoba munwe munye eyokuzalwa.
Lumkhosi oqhutshelwe edolobheni lakoBulawayo ubuyindlela yokupha abalandeli bomdlalo kakhilikithi ithuba lokumvalelisa njengoba engangcwatshwanga kodwa umzimba wakhe utshiswe waba ngumlotha.
Kusenjalo, imidlalo yesigaba seCastle Lager Premier Soccer League edlalwe namhla iphele kanje.
Iqembu leGreen Fuel linqobe ele Sheasham nge 1 ka nya ngaseGreen Fuel Stadium, iqembu leFC Platinum litshaye ele Caps United 2 ka 1 ngaseMandava, iqembu leNgezi Platinum Stars linqobe ele Manica Diamonds nge 1 ka nya ngaseBaobab, iqembu leChicken Inn libe ngutshiki lobhanqa 1 ka 1 leBulawayo Chiefs ngaseLuveve, iZPC Kariba inqobe iHerentals 1 ka nya ngaseNyamhunga, kuthi iBlack Rhinos leTriangle United zibe ngutshiki lobhanqa 1 ka 1 ngaseBata.
Kusasa ngeSonto iqembu leYadah lizadibana lele Cranborne Bullets ngaseBaobab, iqembu leHwange lizadlala leleSimba Bhora ngaseColliery kuthi iqembu leDynamos lizangqikilana leleHighlanders ngaseBarbourfields.
Your browser doesn’t support HTML5
Udaba lokukhunjulwa kuka Heath Streak olubikwa ngu Joseph Njanji