Kulengcwethi ezicubungula ezomnotho ezithi kumele eleZimbabwe liqhubekele phambili lisebenzisa idollar lelizwe loba lilesisindo esiphansi. Kodwa abanye bathi lokhu kuzakwenza abantu bedonse nzima elizweni.
UMongameli Emmerson Mngangagwa utshele uzulu izolo egcotshwa eHarare ukuba uhulumende wakhe uzaqhubekela phambili esebenzisa idollar leZimbabwe. Lokhu kusekelwa ngezinye ingcwethi ezithi ukuqhubeka kokusetshenziswa kwedollar leZimbabwe ndawonye ledola leMelika kubalulekile. Isizatho kuyikuba inhlelo ezinengi ezikahulumende ezimunyethwe ku National Development Strategy 1 ziyenziwa ngemali yakuleli.
UMnunzana Stevenson Dlamini yingcwethi ecubungula ezomnotho welizwe, yenake uthi kungaba liphutha ukuthi kulahlwe idola le Zimbabwe.
“Okubalulekileyo Lapha okumele sikunanzelele lapha yikuba kungani eqonqosele ukuhlala kweZim dollar lomanje sibona ukuthi isimo somnotho seyame kakhulu kumali yangaphandle iUSD.Uthe iyahlala kazange athi uzakhipha, lokhu kuqakathekile ngoba ilizwe lethu lihlezi libelethe izikwelede ezinkulu kakhulu.Singavele sikhiphe iZim dollar kutsho ukuthi ama interest esiwabhadalayo ngale lapha kumabhanga ethu zizamele zibhadalwe ngaleyo ndlela kuzasikhuphulela amatax kubenzima ukubana uhulumende agcwalise inhlelo zakhe.lnhlelo ezinengi zikahulumende zenziwa ngemali yakithi.lnational development strategy lokhe iqonqosela ukuthi ikhona kuze kuyefika u2025 ngeyinye into okumele sibelayo ingqondweni.lbhangalethu iReserve bank of Zimbabwe alikabi lemali eyaneleyo ukubana ilizwe ngokusemthethweni lihle lisebenzise ngokusemthethweni.”
UMnunzana Thabo Ndlovu ingcwethi kwezomnotho uthi okumqoka yikuba uhulumende aphe abantu isiqiniseko ngedola leZimbabwe.
“Into eqakathekileyo, efunakalayo yi confidence kumali yakithi. Kungaba njalo akula ndaba lokuthi sisebenzisa yiphi i currency, abantu bazabe beyamukela imali leyi beyisebenzisa. Nxa ama rates engaqhubeka e stable ngibona kungasohlupho ukuba siqhubeke nge multi currency. Ayisikho ukuthi imali yakithi asiyifuni kodwa sifuna isiqineseko kiyo, ukwenzela ukuba lanxa ngikubhizimusi ngibe assured ukuba kusasa ngeke ngivuke ngingasela lutho. Kungalungiswa indaba ye confidence, sizabona ngitsho laku informal sector sekusetshenziswa iRTGS.”
Kwelinye icele izisebenzi zikahulumende kanye labaphila ngokuthengisa bathandabuza ukuqhubeka kwedola leZimbabwe. Isikhulumeli senhlanganiso yababalisi, eyeAmalgameted Teachers Union of Zimbabwe, umnunzana Thembakuye Moyo uthi ukuqhubeka kokusetshenziswa kwedola leZimbabwe kuchaza ukuba izisebenzi zikahulumende ziyaqhubeka zincindezelwe.
"Kusukisela ngo2018 lapha esathathwela iholo le US dollar, izinto zahle zabambi. Lalamuhla lokhe zizimbi. Singakhangela izisebenzi ezigqoka ama uniform, izicathulo zitshekile konke lokhu kutshengisa ubuyanga bezisebenzi zikahulumende. Ngenxa yokuthi izinga lezisebenzi selawa, sebeyinhlekisa akula obanakayo. Pho nxa uhulumende omutsha ezasitshela ukuthi sizaqhubeka sihola iRTGS ngoba kulokhu kusetshenziswa i Zimbabwean dollar kusitshengisela ukuba vele akala ndaba lazo izisebenzi zakhe.”
Unkosikazi Mellisa Mpofu isakhamuzi sakoBulawayo ophila ngokuthengisa uthi ukuze baqhubeke bekubhizimusi bazaqhubeka bethengisa ngedola leMelika.
“Siyananzelela ukuba uMongameli uthi i-Bond lizaqhubeka likhona. Kodwa ke thina sizaqhubeka sithengisa i forex kuphela ngoba ngeke senelise ukuhlala sikubhizimusi nxa singathengisa nge Bond. Kubuhlungu kubathengi abahola iRTGS kodwa akula ngeyinye indlela ngoba siwoda nge Forex. Okusidanisayo yikuthi sizaqhubeka sigijimisana lama rates as long i Bond likhona okutsho ukuthi ama price ezinto selakho ukuhlala ekhwela njalo nje.”
Isilinganiso sokuthenga idola elilodwa eleMelika emkambo kahulumende limi kumadola aphezu kwenkulungwane ezine lengxenye-ZWL $4,604 kodwa emkambo omyama idola elilodwa libiza amadola azinkulungwane eziyisikhombisa US$1:ZWL $7,000.
SEE ALSO:
Udaba Esilwethulelwe NguBathabile Masuku