Baphelelwe abantu eHwange esabelweni seMatabeleland North kulandela ukugcotshwa kuka Mnumzana Emmerson Mnangagwa besithi kusobala ukuthi bazaswela ukudla lamathuba emisebenzi, njalo lomnotho uzaqhubekela phambili ugugudeka.
Omunye wabatshe amathe ngokhubazekileyo, uMnumzana Philip Ncube, okhala kakhulu ngesomiso sendlala kanye lokusweleka kwemithi ezibhedlela.
“Akungithabisanga ngoba mina ngiyisogoga angiboni, vele ngithwelenzima, akulamali, njalo ezibhedlela bafunimali yokuthi ngibhadale, ngizayithatha nga ngoba kangisebenzi njalo ukudla kasizuzanga lutho ilanga latshisa izulu lazinela kanye lapha kweleHwange.”
Esinye sezakhamizi, uNkozikazi Silimukile Masina, odabuka esigabeni seChisuma, laye uthi udaniswa yikusasa ebuvilibana.
“Izinto ziyawoma ngamandla, akulamisebenzi ukuthi sizincedise. Impuphu ayithengeki, mina njengomuntu omutsha bengikhangelele ukuthi obaba basebenze, lathi siziphandele. Uhulumende ongenileyo akusoze kube lotshintsho ngoba nguye obekhona, kuzaqhubeka kunjalo.”
Ugogo uLucia Ndlovu laye uyakusekela lokhu.
“Lezibhedlela akulalutho, ungahamba esibhedlela kuthiwa bisa imali, kodwa akulanto ethengekayo asizuzi maphilisi, sihlezi sinjalo singabagulayo, lokudla kakukho asivunanga lutho kodwa ukudla kuphiwa ngababafunayo, kithi nya labantwabethu esithi bazasigcina kabatholi mali abalamsebenzi, pho senzeni ngaye, asithokozi.”
UNkosikazi Elina Dube ukhala ngendlala.
“Esikunanzelelayo yikuthi abantwana bayehluleka ukuthi beze bazosingcwaba njengabazali ngenxa yokuthi kuyabe kunzima lakuye umntwana.Size sife sidubeka sikhanuka abantwana. Isiloyiso sethu yikuthi ilizwe lakithi kalilunge, lilungisiswe kuhle abantwana baphenduke bethole imisebenzi ukuze lathi njengabadala siphile impilo enhle.”
UNkosikazi Faith Tshuma laye odabuka ngaphansi kwenduna uMvuthu uthi phezu kwalokho, intengo yempahla iluma isiyaphambili.
“Siphilanzima ngoba abantwana bekufuze bevule namuhla izikolo sekuthiwa bevule ngolweSithathu ngamagcobo lawa akhona, okunye njalo ungaze uhambe esibhedlela uyatshelwa ngokuthi akulamuthi ubuyela endlini uyehlala ubuye uswele futhi lokuthi abantwana sizabakhulisa njani asazi ngoba emakhaya sithenga itshukela US$5 i2KG.”
UMnumzana Mkhonto kaShaka Moyo ukhala ngombuso athi uncidezela uzulu.
“Okudanisayo yikuthi lanamuhla silokhe silabontando kayiphikiswa ongitshilongitshilo. Lokhu kuyadanisa kakhulu ngoba sikhangelele ukuthi ngabe sesisezingeni lentando yoluntu, kodwa lokhe silabantu abanjalo, esingathi ngama ditactors.”
Inkulumo kaMoyo izangesikhathi iqula lenhlanganiso zomanyano wamazwe agoqela iSADC, US Embassy le European Union zisethula ukuba kuphenyo lwabo lokuhlolisisa ukuqhutshwa kokhetho olusanda kwedlula, kunengi okwenziwa ngaphandle kokulandelwa kwesisekelo sombuso okugoqela ukungavezwa kwe Voters Roll, ukuvalwa kwemikhankaso kanye lokubotshwa kwamalunga amabamandla aphikisayo kanye lokunye.
Loba kunjalo,umqondisi wesabelo seMatabelelalnd North kuhulumende, njalo engumngcinisihlalo kubandla leZanu PF kundawonye, uMnumzana Richard Moyo, uthi ukugcotshwa kuka Mnangagwa kufanele ngoba ekhethwe nguzulu ngemisebenzi yakhe aseyenzile kulesisabelo.
SEE ALSO:
Udaba Esilwethulelwe NguNokuthaba Dlamini