Inengi libheke ngabomvu ukuthi ibandla le Citizens Coalition for Change lizathatha manyathelo bani ngempumela yokhetho eliyiphikisayo lapho ikhomishini yeZimbabwe Electoral Commission ethi kwanqoba umongameli Emmerson Mnangagwa umkhokheli webandla leZANU PF hatshi umholi we CCC uMnu. Nelson Chamisa kusikhundla sokuba ngumongameli welizwe.
Uhulumende usegcizelele ukuthi ngempela umongameli Mnangagwa uzagcotshwa ngoMvulo njalo ingcwethi ezicubungula ezombusazwe zithi i-CCC ilakho ukuphikisa limpumela emthethwandaba loba nini kuze kuyefika uMvulo.
Asenelisanga ukuxoxisana lebandla le CCC ngaloludaba ukuze sizwe amanyathelo elizawathatha ngoba iziphathamandla zalelibandla zingasabeli omakhalekhukhwini bazo.
Ukhetho lolu lwasolwa ngumanyano we SADC, AU, lamazwe aphetsheya besithi aluqhutshwanga ngemfanelo njalo lwalungakhululekanga.
Ukuhlaziya loludaba, sixoxe loMnu. Michael Ndiweni umqondisi wenhlanganiso yeBulawayo Vendors and Traders Association engeyinye eyayiqoqa imihlangano yokuthi abantu bexoxisane labazancintisa kukhetho koBulawayo eye Meet the Candidates yena othi bakhuthaza ukuthi kube lokuthula abantu besalindele ukuxazululwa kwaloludaba.
Your browser doesn’t support HTML5
Ingxoxo loMnu. Michael Ndiweni
Kusenjalo, umanyano wenhlanganiso ezilwela amalungelo ababalisi oweProgressive Teachers Union of Zimbabwe uthi ukhuthaza uhulumende ukuthi engavuli izikolo ngoMvulo ozayo ngoba umumo kwezombusazwe ungazinzanga ngenxa yombango kumpumela yokhetho.
Kodwa uhulumende uthi izikolo sezilungele ukuvulwa njalo ababalisi bengakhononi ngokuthi iholo labo liphansi ngoba lithe xaxa.
Okunengi ngaloludaba asikuzweni kungxoxo esiyiqhube lesikhulumeli seARTUZ uMnu. Thembakuye Moyo.
Your browser doesn’t support HTML5
Ingxoxo loMnu. Thembakuye Moyo
UNkosikazi Cora Ndebele owayelomkhankaso oholwa ngabesifazana owokuthi bekhuthaze imndeni yabo elelungelo lokuvota ukuthi ibhalise uthi bayadana ngempumela yokhetho ngoba isichithe ithemba lentuthuko elizweni.
Your browser doesn’t support HTML5
Ingxoxo loNkosikazi Cora Ndebele