Imidlalo yesigaba seCastle Lager Premier Soccer League ingene kuviki yamatshumi amabili lanye ngoMgqibelo njalo inanso impumela yalamuhla:
Ngasenkundleni yeLuveve iqembu leBulawayo Chiefs libe ngutshiki lobhanqa 1 ka 1 le FC Platinum, ngaseBata iqembu leSheasham litshaye eleHwange nge 1 ka nya, iqembu leSimba Bhora libe ngutshiki lobhanqa 1 ka 1 leleYadah ngaseBaobab, iqembu leCranborne Bullets linqotshwe nge 1 ka nya ngele Dynamos ngaseNyamhunga, iqembu leHerentals litshaye ele Ngezi Platinum Stars nge 2 ka 1 ngaseMandava, kwathi eleManica Diamonds lanqobe eleGreen Fuel nge 2 ka nya ngaseGibbo.
NgeSonto iqembu leHighlanders lizemukela eleChicken Inn enkundleni yeBarbourfields njalo umqeqetshi weqembu leBosso uBaltemar Brito uthi kuzakuba ncane indawo emagumeni.
“Siyazi ukuba kuzakube kungekho lula kodwa labo abeChicken Inn bayakwazi labo ukuba lathi sizabe singadlanga nkotshana. Siyakwazi ukuba bayake besibukele njengoba lathi siyake sibabukele kodwa lokhu akutsho lutho ngoba sobabili silakho ukuntshintsha okuthile esivame ukukwenza,” kutsho uBrito.
Iqembu leHighlanders linqotshwe okwakuqala kumidlalo yeligi ngempelaviki eyedluleyo kodwa umqeqetshi weqembu leChicken Inn uPrince Matore uthi lokhu akutsho ukuba seliphenduke umtshatshuzwa.
“Asingeke sithi ngoba benqotshiwe ngempelaviki eyedluleyo sebehle balahla imbeleko ngokufelwa kodwa ngikhangelele ukuba lumdlalo uzakuba nzima ngoba phela yibo abahlezi phezu kwengalane yemiklomelo njalo badlala bengekhaya.
Imidlalo phakathi kwamaqembu asuka edolobheni elilodwa ivame ukubanzima njalo iqembu elizadlala ngokuzimisela yilo elizanqoba,” kutsho uMatore.
Kweminye imidlalo ezadlalwa kusasa iqembu leTriangle lizadibana leleZPC Kariba ngaseGibbo kuthi iqembu leCaps United lizadlala leleBlack Rhinos ngaseBata.
Your browser doesn’t support HTML5
UJoseph Njanji Uyalandisa