Iziphathamandla zedolobho leJohannesburg zithi kuqhubekela phambili ukucwayisiswa kwembangela yomlilo obulele abantu abangamatshumi ayisikhombisa lasithupha - 76 eJohannesburg kanye lohlelo lokudingisisa abafele kuleyo ngozi.
Ekhulumna labezindaba emakhazeni lapho okugcinwe khona imizimba yabafele engozini yomlilo elokitshini leDiepkloof eSoweto, okhokhela inhlelo zokuhlolwa kwezitho zomzimba eJohannesburg, uMnumnzana Thembalethu Mpahlaza, uthe phakathi kwezidumbu ezingamatshumi ayisikhombisa lasithupha (76) zabafele engozini yomlilo wokutsha kwesitezi eJohannesburg, abedlula amatshumi ayisithupha babo (62) batshe okokuthi akubonakali ukuthi ngobani.
Uthi okwamanje baphakathi kokuthatha iDNA yalezi zidumbu besekusithi bathathe futhi lakulezo zihlobo ezicabangela ukuthi izihlobo zazo zifele kulo umlilo.
“Lolu luhlelo oluzathatha isikhathi eside ukuthi kwaziwe ukuthi labo abafele kule ingozi ngobani njalo badabuka kuphi.”
Ngenxa yalesi sizatho akukazakali loba bakhona kumbe hatshi abeZimbabwe abafele kule ingozi. Ngokutsho kwesizalwane seZimbabwe, uNkosazana Nobuhle Sibanda, esikhulume laye izolo, bebengabanengi kakhulu abeZimbabwe abebehlala lapha lobanje bebekhona.
Badinga izidumbu kusakhiwo okufele abantu abanengi eGoli
“Abanengi kakhulu ngabaseMalawi. AbeZimbabwe may ba si few but abenengi ngabeMalawi ngoba abeMalawi bebethi ma uthola iroom idula uzobiza labangane bekwazi ukushare yikho bebebanengi kakhulu.”
Ummeli weZimbabwe kwele South Africa, uMnumnzana David Hamadziripi, uthi kucatshangelwa ukuthi bayisithupha abeZimbabwe abafele kule ingozi kodwa ngeke bakuqinisekise lokho lungakapheli uhlelo lweDNA oluqhutshwa ngamapholisa. Kusenjalo, umgcinisihlalo webandla leCitizens Coalition for Change, uMnumnzana Trust Ndlovu, uthi kulusizi abakubone ngesikhathi besethekelela indawo okutshele khona abantu laba.
“Abantu bafe kabuhlungu. Sikhuluma ngabantu abafe ngomlilo lentuthu bangazi ukuthi bazobalekelaphi. Sikhuluma ngabantu abafe belele. Sikhuluma ngabantwana. Sikhuluma ngabantu abadala, labomama. Bebengalindele ukuthi kuzokwenzeka lokho.”
Okhokhela inhlanganiso yabeZimbabwe kwele South Africa eyeZimbabwe Community in South Africa, uMnumnzana Ngqabutho Mabhena, uthi labo abasele bengelandawo yokuhlala baphakathi kokuphathiswa.
“Batholelwe indawo zokuhlala ngucity council weJohannesburg le Gauteng government. Yibo abancedisa ngezindawo zokuthi bahlale khona okwesikhatshana. Asilayo imininingwana yokuthi zingaki izizalwane zeZimbabwe esezisuke zayahlala kulezo ndawo.”
Kusenjalo, ukutholakala kwabakwamanye amazwe abanengi abebehlala kulesi sitezi okubikwa bebehlala ngokungekho emthethweni, sekuvuse omkhulu umsindo abangafuni abakwamanye amazwe eSouth Africa besethesa uhulumende umlandu wokubangela ukungena kwabantu elizweni ngokungekho emthethweni. Umkhokheli webandla leAction SA, uMnumnzana Herman Mashaba owaziwa ngokungezwani lokungena kwabakwamanye amazwe kwele South Africa, uthi uhulumende lenhlanganiso ezilwela abakwamanhye amazwe laba kumele bahlawuliswe ngaloludaba.
“Abantwana bebehlala esimeni esesabekayo nxa ngikhuluma bethi ungabasusi kulezi zakhiwo ungabatholelenga enye indawo yokuhlala.”
((END ACT)
TEXT: Banengi abadabuka eZimbabwe abahlala kwele South Africa okusemthethweni labangelamaphepha aqondileyo okusebenza lokuhlala kulelolizwe.