UMongameli Emmerson Mnangagwa uzafungiswa ukuqala umsebenzi ngoMvulo ngemva kokunqoba kukhetho olusolwa ngamaqula enhlanganiso ezinengi ezigoqela eyeAfrican Union leyeSadc esithi aluqhutshwanga kuhle.
Ugatsha olubona ngobudlelwano beZimbabwe lamanye amazwe, olweForeign Affairs, lulobele abammeli bezigodlo zakwamanye amazwe incwadi lubanxusa kulumkhosi, wona ozaqhutshelwa enkundleni yeNational Sports Stadium.
Lincwadi ithi kumele kuze iziphathamandla zamazwe ayabe elabakhokheli abamenyiweyo kuphela, okukhomba ukuthi bakhona abalakho ukunganxuswa, ikakhulu labo abamazwe asola impumela yokhetho.
Umsakazo weStudio 7 ubambe unobhala wogatsha olubona ngobudlelwano beZimbabwe lamanye amazwe uMnu Livit Mugejo kodwa wathi uxhumane lesikhulumeli sikaMnangagwa uMnu Groge Charamba yena obengabambeki.
Ukugcotshwa kukaMnangagwa kuza ngesikhathi ibandla leCCC libikwa liqoqa ukuphikisa impumela yokhetho emthethwandaba. Abanye bathi lelibandla lizafikisa amaphepha alo enkantolo ngoMgqibelo.
Igqwetha uMnu Nqobani sithole uthi nxa lokhu kuthe kwenzeka, futhi nxa kulandelwa umthetho, uMnangagwa uyabe engamelanga aqale umsebenzi andubana umthethwandaba uqede ukuthetha loludaba.
Your browser doesn’t support HTML5
Ingxoxo loMnu Nqobani Sithole