Ukudonselana phezu kwempumela yokhetho phakathi kweZanu PF leCCC kuyaqhubeka, ibandla leCCC lisithi selisungula uhlelo lokugqugquzela ukuthi kwenziwe ukhetho olutsha kodwa uMongameli Emmerson Mnangagwa esithi labo abazaphatheka kulokhu kutshengisela bazajikelwa emajele.
I-CCC ithi kwaba lokuqilibezela kulolukhetho njalo ithi ubufakazi elabo buveza sobala ukuthi umkhokheli wayo uMnu Nelson Chamisa nguye owanqobayo.
Kodwa uMnangagwa utshele abasekeli beZanu PF eBuhera North ngoLwesine ukuthi wanqoba ngendlela ecacileyo ngoba abantu bemthanda kanye lebandla lakhe leZanu PF.
"Ngixwayisa noma ngubani ofuna ukudala ingxabangxoza [ngokutshengisela], sikulungele ukubhekana lakho. Ofuna ukwenza inkulumo elenzondo uzakwetheswa icala, amajele ethu awagcwalanga," kutsho uMnangagwa.
Abahlola ukhetho lolu bemele inhlanganiso ezitshiyeneyo ezigoqela oweSadc loweAfrican Union bathi ukhetho lolu aluqhutshwanga ngemfanelo.
Umsekeli wesikhulumeli sebandla leCCC uMnu Gift OStallos Siziba uthi abasoze bethuselwe nguMnangagwa ngoba ukutshengisela kulilungelo abaliphiwa yisisekelo sombuso, i-constitution.
Ukuhlaziya loludaba sixoxe leZanu PF uMnu Leo Kachingwe endawonye lelunga leCCC eMelika uMnu Tim Muringai, onguye osungula lingxoxo.
Your browser doesn’t support HTML5
Ingxoxo loMnu Tim Muringai loMnu Leo Kachingwe