Kulokwesabela ukuthi kungaba lezizalwane zeZimbabwe phakathi kwabantu abangamatshumi ayisikhombisa lantathu, 73, abatshe bafela kusitezi abakade behlala kiso eMarshalltown, enzikini yeJohannesburg, kwele South Africa, ngemva kokuba isakhiwo lesi silumathe umlilo ekuseni ngoLwesine.
Kulimale abedlula amatshumi amane.
Isigodlo seZimbabwe kweleSouth Africa sithi sesithumele iqula laso ukuthi liyephenya ukuthi bakhona yini abeZimbabwe ababhubhele kulingozi.
Abahlala esitezi lesi bathi umlilo lo uqale ngehola lakuqala ekuseni, ngo-1 o’clock, njalo bacabangela ukuthi ubangelwe ngumuntu obesebenzisa ikhandlela.
Iziphathamandla zona zithi akukakhanyi kuhle ukuthi lumlilo ubangelwe yini, kodwa okukhanya sobala ngumonakalo owudalileyo nanku utshiye izimuli ezedlula amatshumi ayisikhombisa zisesililweni.
Johannesburg fire
UMongameli weleSouth Africa uMnu Cyril Ramaphosa uthumele amazwi enduduzo ezimulini zabafi esithi kulusizi kakhulu okwenzakeleyo.
IStudio 7 ifike kusakhiwo lesi yathola kunyakazela amaqula osizo oluphuthumayo, amapholisa, abekhansili, abohlangothi olucitsha umlilo labezimota ezithwala izigulane.
Isizalwane seZimbabwe uNkosazana Nobuhle Sibanda, ohlala kulesi sakhiwo labantwabakhe ababili lomkakhe, uthi bathe bevuka sekugcwele intuthu indawo yonke.
Ngenhlahla uthi wenelisile ukuphuma labantwabakhe njengoba umkakhe ubengekho esemsebenzini. “Ma ngithatha abantwana sithi siyaphuma already sekugcwele intuthu. Ukuthi sikwazi ukuphuma egethini akusaphumeki abanye sebesheshe bawubona umlilo," kutsho uMaSibanda.
"Sekuhlangahlangane bakhipha imbheda, bakhipha izingubo thinasizama ukubana siphume labantwana. Saphuma kodwa siphume nzima. Abafana abanye abalimele balimele ngoba besebephuma ngamafasitela.
"Abanye baphephile kodwa abanye abaphephanga. Abanye bazamile ukuthi baphume kodwa behlulwa yile intuthu ebisigcwele ngoba besesisehluleka lokuphefumula.”
Esinye njalo isizalwane seZimbabwe uNkosazana Irene Ndamba, laye ohlala kulesi sakhiwo uthi yena usinde ngoba ubesebenza ebusuku kodwa uthe esizwa ukuthi impahla zakhe sezisitsha wabeletha inyawo eqonda khona.
Kodwa uthi usizi yikuthi akulangitsho lokhezo olulodwa anelise ukuphuma lalo.
"Abanye abantu bafele phakathi. Kuthiwa umlilo uqale kubasement. Abaphezulu bonke behlukele ukuphuma ngenxa yentuthu lomlilo," kutsho uNkosikazi Ndamba.
"Abafana yibo abakwanise ukuphuma because baphume emawindini. So abafazi labantwana behluleke ukujumper. Yibo abantu abafileyo abanengi abafazi labantwana.”
Ummeli weZimbabwe kweleSouth Africa, uMnu David Hamadziripi, utshele iStudio 7 ukuthi akukacaci ukuthi bakhona yini abeZimbabwe ababhubhele kulumlilo kumbe abalimeleyo.
Kodwa uthe sebethumele abehofisi yakhe ukuthi bayephenya futhi babone ukuthi bengaphathisa njani labo abadinga uncedo.
Iziphathamandla zedolobho leJohannesburg zithi abakade behlala kulesi sakhiwo bebesenza lokhu ngokungekho emthethweni. Zithi lesi ngesinye sezakhiwo lapho okuhlala khona abantu ngenkani bengelamvumo.
Johannesburg fire
Isikhulumeli sogatsha olupha usizo oluphuthumayo eJohannesburg uMnu Robert Mulaudzi, uthi inani lasebebhubhele engozini le liqhubeka liqonga njengoba lokhe besathola ezinye izidumbu kanti kulabanye njalo ababangwa lezibi ezibhedlela.
“Siphakathi kwenhlelo zokudingela uncedo labo abehlelwe yile inhlekelele kugoqela lokududuza labo abalahlekelwe yizihlobo zabo.”
Abomsebenzi wokunceda imuli ezifelweyo ama Funeral palour, ikakhulu lawo avame ukunceda abe Zimbabwe ukuthwala izidumbu ukuba ziyengcwatshwa ekhaya labo bebekhona kulindawo njalo babikwa besithi bazimisele ukuphathisa.