Imizamo yokuvuselela ubudlelwano beZimbabwe lamazwe angentshonalanga afana leMelika leBhilithani ikhanya isisengozini yokutshabalala ngemva kwempumela yokhetho olwenziwe ngeviki edluleyo esolwa ngamazwe lawa kanye labomanyano weSadc loweAfrican Union.
Ikhomishini ebona ngezokhetho, iZimbabwe Electoral Commission (ZEC), ithi uMongameli Emmerson Mnangagwa lebandla lakhe leZanu PF yibo abanqobileyo, kodwa umkhokheli weCCC uMnu Nelson Chamisa uthi kwaba lokuqilibezela.
Uhulumende weMelika yena wethule umbiko ngoLwesibili esola indlela ukhetho lolu oluqhutshwe ngayo futhi esithi usekhulumisana labaholi bamazwe akhelane leZimbabwe ngaloludaba.
"Sesikhulumisana labaholi bomhlubulo (wezansi yeAfrica) ukuze sibazise ngokukhonona kwethu, kanye lokuthi lokhu kutshoni kumizamo yamazwe omhlaba yokuvuselela ubudlelwano leZimbabwe," kutsho isikhulumeli sogatsha lweMelika olubona ngobudlelwana balelilizwe lamanye amazwe, olweU.S. State Department, uMnu Matthew Miller.
Uthe engena embusweni okwakuqala ngo2018, uMongameli Mnangagwa usungule umkhankaso wokuzama ukuvuselela ubudlelwano beZimbabwe lamazwe agoqela eleMelika leleBhilithani.
Amazwe la achitha ubudlelano bawo leZimbabwe eminyakeni edluleyo ngoba esethesa uhulumende weZanu PF amacala atshiyeneyo agoqela elokwephula amalungelo oluntu, imisebenzi yenkohlakalo kanye lokungaqhubi ukhetho ngendlela eqondileyo.
Uhulumende kaMnangagwa ubelethemba lokuthi iZimbabwe izakwamukelwa njalo ngamazwe la iphinde ibuyiselwa kuCommonwealth, okungumanyano wamazwe ayebuswa yiBhilithani, ngemva kokucela imvumo kulandela ukhetho luka2018.
Kodwa ingcwethi kwezombusazwe efundisa ekolitshini leWits University kweleSouth Africa uDr. William Jethro Mpofu uthi imizamo le isizatshabalala njengoba amazwe angentshonalanga esithi ukhetho alwenziwanga kuhle.
Uthi ubudlelwano beZimbabwe lamanye amazwe aseAfrica labo sobulakho ukuphazamiseka nanku lenhlanganiso yeAfrican Union leyeSadc lazo zisithi ukhetho aluhanjiswanga ngendlela.
Your browser doesn’t support HTML5
Ingxoxo loDr William Jethro Mpofu