Inhlanganiso yeSouthern African Development Community (SADC) ikhangelelwe ukuba izathumela kwele Zimbabwe iqula lePanel of Elders, ukuyahlola impumela yokhetho olusanda kuqhutshwa kulelolizwe.
Iqula leli lizakhokhelwa nguMnu. Jakaya Kikwete, owayengumongameli wakwele Tanzania
Lokhu kuphume encwadini elotshwe yiSADC isiya kugatsha lomphathintambo obona ngobudlelwano beZimbabwe lamanye amazwe isithi izathumela iqula leli ukuyakuzwa ngodaba lokhetho kuleli. Isikhulumeli sogatsha olubona ngobudlelwano beZimbabwe lamanye amazwe, uMnu. Levit Mugejo, uthe bayitholile lincwadi le, kodwa kakwazi ukuba bazafika nini elizweni.
“Nxa usitsho iqula lika Kikwete, khulumani lo Mnu Kikwete. Zwanini ku hofisi yakhe ukuba uzafika nini"
Ingcitshi ezicubungula ezombusazwe zithi inyathelo elithethwe yiSADC liqondile ngoba yikho sibili okumele kwenzakale ukuze impumela yokhetho yemukeleke.
UMnu. Hebert Chamuka, ingcwethi kwezombusazwe uthi ukuza kwequla leSADC Panel of Elders yiyo yodwa indlela yokuba kulungiswe udubo lwempumela yokhetho lweZimbabwe.
“Siyamukela ukubuya kwabakhokheli eSADC. Indaba ngeyokhetho olwenziwe mhlaka 23. Udubo olukhona yikuthi iZANU PF ayifuni ukuphikiswa besithi bavela empini. Kulungile okwenziwa yi SADC ngoba iZANU ifuna ukuba ilwiswe ngabantu bonke"
Lokhu kusekelwa nguMnu. Beloved Siduna, eyinye ingcwethi kwezombusazwe ezimeleyo.
"Nxa iSADC isiza kuleli yiyo yodwa indlela ezakwenza ukuba udubo kuleli luphele. Sodwa njengabantu be Zimbabwe ngeke sikuqede lokhu"
Incwadi eyalotshwe ngumanyano weSADC izeva ukuba ukuza kwabo eZimbabwe kwavunyelwana emhlanganweni omkhulu owenhlanganiso le mhlaka 17 Ncwabakazi lonyaka.
Kusenjalo, uMnu. Matthew Miller, isikhulumeli sohlangothi lukahulumende weMelika olubona ngokudlelana lamanye amazwe, uthi kaluqhutshwanga ngemfanelo ukhetho kwele Zimbabwe.
Ingcitshi ecubungula ezombusazwe, uMnu Liberty Ncube, uthi kuqakathekile ukuba eleMelika lisekele amazwe aweSADC kuloludaba.
"Kuhle kakhulu ukuba ele Zimbabwe lincediswe ngamazwe aphandle, kodwa ele Melika nxa lifuna lokho elikutshoyo kuhlonitshwe kumele lisebenze le SADC"
Inhlanganiso ezahlola ukhetho kwele Zimbabwe zithi zizakwethula umbiko ogcweleyo ngemva kwenyanga ezimbili ngesimo sokhetho zisithi labo abangasuthisekanga ngokhetho kabaye emthethwandaba.
Kulonye udaba, uzulu eZimbabwe ukhonona ngokuvalwa ngci kwemigwaqo ngamapholisa eHarare. Abanengi abahlala eMufakose, Mabvuku, Warren Park lakwenzinye indawo bathi kulokwesabela okukhulu ngendlela amapholisa asegcwele indawo yonke ngemva kwempumela yokhetho.
Kodwa isikhulumeli samapholisa, uMnu. Paul Nyathi, uthi amapholisa alondoloza ukuthula elizweni.
"Thina njengamapholisa akula muntu encindezelwayo. Nxa ekhona othi utshaywe ngamapholisa kazemangala kithi. Sigcina umthetho"
EleZimbabwe liqhube ukhetho lokudinga amakhansila, amalunga edale lephalamende kanye lomongameli. Emadolobheni amanengi, abantu bavotele ibandla leCCC kwathi emaphandleni bavotela iZanu PF.