Esabelweni seMatabeleland South abaphikisayo bathi lutshontshiwe ukhetho lwalonyaka njengalokhu okwenzakala ngomnyaka ka2018.
Lanxa abakubandla leZanu PF bethabe bemanzi te ngemva kokunqoba kuka Mnangagwa, abanye ngabathi bakholwa ukuthi ibandla leZanu PF liqilibezele.
UMnu Reason Dube uthi inengi labantu livuke lidanile namuhla ngemva kokuzwa impumela yokhetho lukamaongameli.
“Abantu bebekhangelele ukuthi ibandla thize eliphikisayo lizanqoba kubelontshintsho kodwa akusahambanga ngaleyo lendlela, ngendlela engibone ngayo abantu balokudana kakhulu ukuthi sesikulesi isimo futhi ngike ngangena edolobheni ngathola ukuthi abantu abajabulanga.”
Lanxa abalandeli beZanu PF bejabulela ukunqoba kwabo, lelibandla kalizange liqhube kakuhle kulolukhetho lapho kuqathaniswa lokhetho luka2018. Ibandla leZanu PF lathola izihlalo ezilitshumi lambili kukhetho olwadlulayo kodwa okwamanje lithole eziyisitshiyangalombili.
UMnu. Malachi Nkomo, okubandla leli, uthi lanxa betshayela uMnangagwa inhlombe kabajabulanga ngendlela abanqobe ngayo eZansi yeMaNdebeleni.
“Nxa sesikhangela kumaMPs yebo sinqobile ukuthi sithole 8 ngoba inhloso yethu besifuna ukuthi sithole 12 yonke, sesikhangele amaconstituency aduze lomngcele kulabantu abanengi abakade bengena bevelela phandle , yebo balelungelo ngoba bengabantwana bekhaya kodwa imfundiso ababuye layo yiyo engabe iphambanise abantu bacina bengasasivotelanga ngendlela esifuna ngayo.”
Abalandeli bebandla leCCC bathi lutshontshiwe ukhetho lolu.
UMnu. Ntando Ndlela, isikhulumeli sebandla leli eMatabeleland South, uthi luphekaphekiwe ukhetho lolu.
“Lamhlanje ilizwe leZimbabwe lalapha eMatabeleland South lingene esikhathini sokukhala, esikhathini sokulahlekelwa lokufelwa, abantu beMatabeleland South leZimbabwe jikelele bavotele inguquko kodwa IZEC isebenzelana leZanu PF lenhlanganiso yeFAZ bakhethe ukuthi bantshontshele abantwana beZimbabwe ithuba labo lenguquko silobufakazi bokuthi ukhetho lolu luntshontshiwe.”
UMnu. Cannicious Nkala, isiphathamandla seZAPU, eZansi yeMaNdebeleni onqotshwe kukhetho lwamakhansili eGwanda, uthi kunengi okungaqhutshwanga kahle kukhetho lwalonyaka.
“Ukhetho lonke nje aluzange luqhutshwe kakuhle njalo ibisekele elinye icele njengoba leSADC labanye bonke ukuthi basoleni lathi sikubonile khonokho okwamatafula akade ekhona, kunengi okusisolisayo kodwa ngeke sitsho ukuthi akuphumanga kanjalo ngoba vele umuntu uvele wakhipha labanye wavalela labanye phandle.”
UMnu. Zwelithini Gabula, odabuka eSitezi eGwanda North, uthi inkokheli ezikhethiweyo sokumele zisebenzele ukuthuthukisa impilo yezizalwane zakuleli kungela nkethabetshabi.
“Laba asebethe banqoba kukhetho akube ngabantu abalobuqotho, abazakuma ngeqiniso lokuthembeka babekwazi ukuphatha uzulu ,babekwazi ukuthi nxa sebengene emahofisi sebekhulula amabhatshi ezepolitika babekwazi ukuthi sebengabaholi babantu.”
Akwaziwa ukuba kuzakwenzakalani esabelweni lesi kulandela ukunqoba kwebandla leZanu PF. Inengi labantu esabelweni lesi libalekela eGoli uma libhekane lenhlupho ezitshiyeneyo.
SEE ALSO:
Udaba Esilwethulelwe NguAlbert Ncube