Sekulabantu asebebotshiwe ngesikhathi abantu bevota kusukisela izolo, kulemibiko njalo yezehlakalo zodlakela kwezinye indawo zelizwe. Kwezinye indawo abasekeli beZanu PF babikwa belayiniswa behlolwa ukuthi ngempela bavotile.
Lobanje ukhetho luqhutshwe ngokuthula kwezinye indawo zelizwe, kube lokufuthelana okuqhamuke endaweni ezehlukeneyo kulandela ukuphuza kokufika kwamaphepha okuvota lokuphuza kokuvulwa kwezinye indawo okwelule isikhathi sokuvota kwaze kwaphela namhlanje ekuseni.
KoBulawayo amabandla aphikisayo akhala ngenhlanganiso eyeForever Associates Zimbabwe bethi yephula amalungelo okuvota. Lokhu kuchasiswa kabanzi lilunga lebandla leCitizens Coalition for Change, uMnu Shelton Tembo.
"Kulemota yeFAZ ebihamba ingena kumapolling station kithi bafike befuna ukuba abeZEC ibaphe ukuthi ngobani abavotileyo kodwa bacine bebaleka ngoba sibalele ukuba bahlukuluze abeZEC kuyikuthi akukho emthethweni abakwenzayo."
Ilunga leCentral Committe yebandla leZANU-PF uMnu Joseph Tshuma usola ukuhlukuluzwa kwamalunga eFAZ ngoba basebenzelana lebandla lakhe.
"Njengebandla sikhathazekile ngobudlwangudlwangu obenzakale eBikita lapho abantu beFAZ abahlukuluzwe khona lobanje bebelandela umthetho wokuvota. Abe FAZ bebelohlelo lwabo njalo bebelandela imilayo yokhetho lokhu okwenziwe yiCCC izwe lonke ukuhlukuluza abantu beFAZ besenza ucwaningo lwabo asivumelani labo bekunani ukuthi labo benze olwabo uhlelo."
Inengi elikhulume leStudio 7 lithi amapholisa abaphethe kuhle koBulawayo bekungela dlakela kodwa ukhetho alubalulekanga ngoba amaphepha okuvota aphuzile ukubuya kuthi inengi labantu lehlulekile ukuvota ngoba amabizo abo engekho kuluhlu lwababhalisela ukuvota.
NgoLwesihlanu amaqula abekade bezohlola ukhetho lwalonyaka kuleli agoqela inhlanganiso ezinjenge European Union akhangelelwe ukwethula umbiko wabakubone kusenzakala kukhetho lweZimbabwe, eHoliday Inn eHarare. Kuthi inhlanganiso yomanyano wamazwe awezwekazi le Africa eye Southern African Development Community-SADC yona izabe ise Rainbow Towers leyomanyano wamazwe abensundu eye Africa Union.
Isikhulumi samapholisa iZimbabwe Republic Police uMnu Paul Nyathi ukhuluma ngobudlwangudlwangu ngesikhathi sokhetho
“Okwamanje silabakhokheli bamapholisa lamapholisa kuzozonke indawo zelizwe abakhangela ngokulondolozwa kokuthula ngesikhathi sokhetho bazasazisa ukuba kuhamba njani endaweni zelizwe ezehlukeneyo ngoba uhlelo lokhetho lokhe luqhubekela phambili."
Izolo eHarare kulabantu abangamatshumi amathathu lasikhombisa abasebenzela inhlanganiso ezikumsebenzi wokulodolozwa kwelungelo loluntu ngokuphathelane lokhetho eyeZimbabwe Election Support Network -ZESN leElection Resource centre-ERC ababotshwe behlola ukhetho besemawofisini abo abakhangelelwe ukumiswa phambi komthethwandaba kusasa.
Kulemibiko njalo yokuthi kungabe kufe umuntu oyedwa izolo kodwa kuleminye njalo imbiko egoqela owamapholisa othi lumuntu akafanga.