Umkhokheli webandla eliphikisayo, uMnu. Nelson Chamisa, uthi kumele abantu bevuselele ubuntu bukamuyi, uJoshua Mqabuko Nyongolo Nkomo, owayefisa ukuthi abantu eZimbabwe babambane njalo ilizwe lithakazelelwa ngumuntu wonke.
UChamisa wethule amazwe la namuhla eWhite City Stadium koBulawayo emhlanganweni omkhulu webandla leCitizens Coalition for Change, wokukhankasela ukhetho oluzakwenziwa kunsukwana ezilandelayo. UChamisa ucele abantu ukuba bemvotele labanye bakhe, esithi lokhu kuzakwenza ukuba alungise ilizwe ngedlela eyayifunwa nguNkomo, owayesaziwa ngokuthi nguFather Zimbabwe.
CCC White City Rally
UChamisa uthe kulobandlundlulo olumangalisayo eZimbabwe okuncindizelwa aMaNdebele kaMzilikazi kaMatshobana, abalezikhundla ezingatsho lutho kuhulumende lakumankampani elizwe. Uthi uzakumisa konke lokhu engakhethwa nguzulu ngoLwesithathu.
Uphinde wathi uzalungisa okunengi okuhlupha abantu eZimbabwe, okugoqela ukuswelakala kwemisebenzi, ukubhidlika kwezibhedlela, ubukhohlakali lokunye. Uthe uhulumende wakhe uzakwenza kube leziphandlamandla zikahulumende ezimbalwa njalo uzakwekela ukudinga abasekeli beziphathamandla lezi.
Uthe kuzalungiswa njalo udaba lwezabelo, okuzakwenza ukuba ahlale koBulawayo leHarare. Ugcizelele esithi uzalungisa umnotho osugugudeke okwethusayo, ezemfundo lokuhlupha amapholisa lamasotsha, athi alile ukuvotela ibandla leZanu PF kukhetho lwama postal balloting.
CCC White City Rally
Omunye wabahambe emhlanganweni lo nguMnu. Dumisani Nyongolo Nkomo, umntwanonewabo kaJoshua Mqabuko Nkomo.
Ibandla leZanu PF namuhla beliqhuba imihlangano etshiyeneyo ezindlini zabantu njalo likhangelelwe ukuba lizakwenza imihlangano ntambama, ebizwa ngokuthi ngama-pungwe, ezabelweni ezitshiyeneyo. UMnu. Richard Moyo, umphathintambo wesabelo seMatabeleland North, uthi baqhuba kahle imikhankankaso yabo ngoba uzulu uthakazelela okungenziwa nguMnangagwa engavotelwa mhlaka 23 Ncwabakazi.
UMoyo uthi bazalungisa okunengi okufiswa nguzulu abantu bengavotela uMnangagwa, amakhansila labafisa ukungena kudale lephalamende bekubandla leZanu PF.
Amabandla ambalwa azancintisa kukhetho olukhulu oluzayo kuthi abalitshumi lanye – 11 bafisa ukungena esikhundleni sikamongameli. Ibandla leCCC lizakwenza umhlangano walo omkhulu kusasa eHarare, owokugqiba umkhankaso wokhetho lolu.
SEE ALSO:
Udaba Esilwethulelwe NguEzra Tshisa SibandaUzangena uChamisa kumbe hatshi? Sixoxe loNkosazana Nonhlanhla Mlotshwa, okubandla leCCC, loMnu. Joseph Tshuma, okudale leZanu PF Central Committee.
SEE ALSO:
Ingxoxo Esiyenze loNkosazana Nonhlanhla Mlotshwa loMnu. Joseph Tshuma