Intathelizindaba zeStudio 7 ebeziqoqa ukuyasebenzela eZimbabwe ngesikhathi sokhetho zivela eWashington D.C. zincitshwe imvumo nguhulumende, okuyinto engaphathanga kuhle iziphathamandla zomsakazo weVoice of America (VOA).
I-Studio 7 yakhweza amaphepha ayo kugatsha lukahulumende olubona ngokwethulwa kwemibiko icelela intathelizindaba lezi imvumo kodwa iziphathamandla zalolugatsha zaphendula zisala futhi zingaphi isizatho.
Le yinto esolwe kakhulu ngumqondisi weVOA uNkosikazi Yolanda Lopez, yena othe bakhathazekile kakhulu ngokwaliswa kwentathelizindaba zabo ukuya eZimbabwe, esithi uhulumende kumele avumele abathaphi bezindaba ukungena elizweni balobe ngendaba zokhetho kungelamigiqo.
“Kusiphathe kabi kakhulu ukuzwa ukuthi ezinye zentatheli zethu zincitshwe imvumo yokuya eZimbabwe phambi kokhetho lwangoLwesithathu,” kutsho uNkosikazi Lopez.
“Ngaphandle kokuhatshwa kwezindaba ngeqiniso kukhangelwa inhlangothi zonke,” kuqhubeka u-López, “abavoti baseZimbabwe ngeke bathole izindaba ezibalulekileyo besiya-nje okhethweni.
“I-VOA icela iziphathamandla zonke ukuthi zivumele abezindaba abafuna ukuyathapha izindaba zokhetho lweZimbabwe.”
Kulezinye njalo intathelizindaba ezisebenzela amaphephandaba lemisakazo yamazwe engentshonalanga ezaliswe ukungena eZimbabwe zilanda ukhetho.
Intathelizindaba yakweleSouth Africa esebenzela enye ihlanganiso ezimeleyo uMnu Chris Maroleng, ofike elizweni ngoLwesibili labanye abathathu belanda ukhetho baduduliwe baxotshwa eZimbabwe ngoLwesine.
Umqondisi wenhlanganiso yabahleli eyeZimbabwe National Editors Forum uMnu Njabulo Ncube usole kakhulu uhulumende ngokuvimba intathezindaba zeStudio 7.
Your browser doesn’t support HTML5
Ingxoxo loMnu Njabulo Ncube
Ezinye intathelizindaba zeStudio 7 ezivele zisebenzela eZimbabwe zona ziyitholile imvumo yokuloba ngokhetho.
Kodwa abafuna ukuhlola ukhetho abayizizalwane zeZimbabwe abafana legqwetha uMnu Musa Kika labo bancitshwe imvumo nguhulumende.
UKika utshelwe ukuthi uncitshwe imvumo ngezizatho eziphathelane lokuvikelwa kwelizwe.