Abazancintisa kukhetho lwamakhansila eGwanda kukhetho lweviki ezayo bathi bazasebenza gadalala ukuthuthukisa idolobho leli nxa bengavotelwa, ngasikhathi sinye izakhamizi lazo ziveza lokhoezifisa kwenziwe yilabo abazanqoba.
Abenelisa ukubhalisa ukuthi bancintise kukhetho lwamakhansila eGwanda bathi kunengi okusamele kwenziwe kulelidolobho okubalisa ukuqeda udubo lwamanzi, ukuswelakala kwamagetsi kwamanye amalokitshi kanye lokusilela kwezikolo zikamanisipala.
UMnu Ngqabutho Mpofu owebandla leMthwakazi Republic Party ozancintisa kuWard 5 eGwanda uthi zinengi indubo ababhekane lazo ikakhulu elokitshini leSpitzkop North.
“Amanzi abo kamiswa ngendlela enhle nxa kukhangelwa ukuthi kumele babhadale ngayiphi indlela, lapho engihlala khona ungakhangela kakhulu imigwaqo yakhona ifuna amabridge umanisipala wayiyenza kazange wafaka amabridge,indawo yethu ayila magetsi sasesikhangelele sathembela emasoleni lokhu ke amasela asuka azenzela santando kakho loyedwa owabotshwayo.”
UMnu Edgar Ncube oncintisa emmele ibandla leCitizens Coalition for Change, kuWard 6 eGwanda uthi uzalwisa ukuthi kwakhiwe isikolo sikamanisipala ukuze abafundi bengahambi imango emide besiya dinga imfundo.
Edgar Ncube Gwanda Council Candidate
“Ngizamela izifuno zabantu bakaWard 6 kodwa ngilesifiso sokuthi ngitshutshise indaba yokuthi uWard 6 katholakale eleprimary school athole indawo yokuthi kubeleprimary school ungananzelela uWard 6 kalasikolo , izikolo ezikhona zikwamanye amaward njalo futhi zingamaprivate asozeCouncil kungakho ngifisa ukuthi iCouncil inakekele abahlali bakaWard 6 labo bathole isikolo.”
UMnu.Cannicious Nkala owebandla leZAPU laye ozancintisa kuWard 6 uthi kunengi okumele kwenziwe kumanisipala weGwanda.
“Sibelendlela zokuthola imali ngoba kathesi silohlupho lokuthi uyathola izisebenzi zikamanisipala zihlala zingaholanga ngoba asilandlela zokuthola imali, kulokuthi sithole imali ngemithelo kumele sibelendlela zokuhuga abazavula amabhizimusi lapha kubelemisebenzi kubelamafemu.”
UMnu Thulani Moyo owebandla leZANU PF owakhethwa engancintiswanga kuWard 2 uthi yena uzalwisa ukusebenzela izakhamizi zonke zedolobho leGwanda kungakhathalekile ukuthi ngabebandla liphi lezombusazwe.
Gwanda City Council
“Ngikhulekela ukuthi kungabi lozangena ethi mina ewadini yami, mina ewadini yami akumelanga kumele ukhulumele iGwanda, nxa siseCouncil sikhulumele abantu beGwanda, kumele ngibekwazi inhlupho zabantu beSpitzkop, abeGarikai, asiphiwanga okufunanayo yebo,asidonsi okufananayo yebo, asisoze sidonse futhi okufananyo yebo ,kodwa imbono ingafanana siyenze okufananyo singaphumelela.”
Izakhamizi zeGwanda zona zithi zifuna amakhansila azasebenzala uzulu weGwanda ngokuzinikela okukhulu. Lokhu kufakazwa nguNkosazana Lungile Masuku.
“Kube ngamaCouncillors asebenzisana labantu , kube ngamaCouncillors angela bugwelegwele ,kube ngamaCouncillors alale okukhulunywa yizakhamizi athathe imbono ekhulunywa yizakhamizi bathuthukise iGwanda ukuthi nxa besebenza bakwazi ukuthi bathunywe yithi abazifakanga ekhansilini.”
Okwamanje umanisipala weGwanda ubhekane lodubo lwezikwelede, ukusilela kwamanzi, ukungathwala kwezibi ngesikhathi kanye lokwehluleka ukubhadala izisebenzi ngesikhathi.