Abazohlola ukhetho lonyaka abenhlanganiso ezitshiyeneyo ezigoqela iSADC, Commonwealth sebefikile eZimbabwe. Amaqula alezi nhlanganiso athembise ukuthi azasebenza engesekeli cele loba uhlangothi lapho behlola ukhetho lwe Zimbabwe mhlaka 23 Ncwabakazi.
Emhlanganweni wabo wakuqala lentathelizindaba owenzelwe eHarare namhlanje, amalunga amaqula aweSADC leCommonwealth, bakhuthaze ele Zimbabwe ukuba lilandele imithetho lokulondoloza ilungelo loluntu ngesikhathi ukhetho luqhutshwa ngeviki ezayo.
Iqula le Commonwealth libunjwa ngabalitshumi lane-14 abazahlola ukhetho kuleli njalo lithi abantu laba bagoqela ingcitshi kwezomthetho, ezokhetho, ezamalungelo oluntu lezokwethulwa kwemibiko.
Commonwealth Zim elections observer mission
Ekhuluma kulumhlangano uNkosikazi Amina Mohamed okhokhela iqula le CommonWealth uthi balethemba lokuba ele Zimbabwe lizaquba ukhetho ngendlela ekhululekileyo.
"Ngesikhathi sisenza umsebenzi wethu sizathuma abazakhangela ukhetho endaweni ezehlulekeneyo ze Zimbabwe ngesikhathi ku votwa lalapho kubalwa amavoti"
UNkosikazi Mohamed uthe bazahlangana labenhlanganiso ezizimeleyo, abamabandla ezombusazwe lawokholo, abazomvikela lozulu jikelele, besizwa ukuba isimo sokhetho simi njani elizweni. Uthe iqula lakhe lizathumela amalunga alo endaweni ezehlukeneyo zelizwe mhlaka 21 ngo Mvulo, ukuze zitsho ukuba umumo wokhetho umi njani elizweni.
Okhokhela iqula le SADC uMnu Never Mumba uthi balesiqiniseko sokuthi ele ZImbabwe lizaqhuba ukhetho olulokuthula njalo oluhlonipha amalungelo oluntu.
"ISADC ukhuthaza uzulu wonke obhalise ukuvota ukuba enze okuselungeni labo ngokuya vota mhlaka 23 Ncwabakazi. Sifisa ukuba ukhetho lolu lwenziwe ngendlela elokuthula njalo lukhululekile"
Ingcitshi ecubungula ezombusazwe uMnu Teddy Ncube uthi kuqakatheke kakhulu ukuba ukhetho luhlolwe ngabantu baphandle.
"Lokhu kutsho ukuba uhulumende we Zimbabwe uphila kuhle labantu. Asiwo wonke amazwe avumela abantu ukuba bazakhangela ukhetho kuleli"
Kodwa eyinye njalo ingcitshi ecubungula ezombusazwe, uMnu Elisha Gumbo uthi kuqakathekile ukuba ele Zimbabwe lilandele umthetho ngesikhathi kuqhutshwa ukhetho.
"Lokhu kutshengisa ukuba eliZimbabwe kumele li elilandela umthetho. Yilizwe elibumbekileyo, lilizwe elile democracy. Lokhu kuqakathekile ukuba kume njani"
ISADC ithi layo kayisoze ithathe icele isithi ilethemba ukuba uzulu we Zimbabwe uzazikhethela inkokheli ayithandayo ngokhetho lwangoLwesithathu weviki ezayo. ISADC ihlala isiza ukuze hlola ukhetho kuleli kusukela ngomnyaka 2000.
Ukuza kwe Commmonwealth kuleli ngokwesibili selokhe ele ZImbabwe laphumayo kulumanyano wamazwe ake abuswa ngeleBhilithani ngomnyaka ka 2003. Amaqula womabili athi azakwethula imibiko yawo ngesimo sokhetho eZimbabwe, ngemva kokhetho, mhlaka 29 Ncwabakazi. Imizamo yeStudio 7, yokuzwa imibono kahulumende ngokukhulunywe yilamaqula aweSADC leCommonwealth, emhlanganweni lentthelizindaba yehlule njengoba umpathintambo wezokwethulwa kwemibiko uNkosikazi Monica Mutsvangwa kanye lonobhala omkhulu wogatsha lwakhe, umnumzana Nick Mangwana bebengadobhi incingo zabo zikamakhalekhukhwini.
Ele Zimbabwe liyakukhetho mhlaka 23 Ncwabakazi kulenkuthazo yoluba uzulu wonke okuluhlu lwababhalisa ukuvota eleVoters Roll aphume ngobunengi ayevota.