Ibandla leCitizens Coalition for Change, eliphanyeke izolo udaba lokuvota kwabakubutho lamapholisa emthethwandaba, lithi kalisoze lamukele impumela yokhetho yabavote ezinkambeni ngoba ukhetho lweposo kaluqhutshwanga ngemfanelo.
Ibandla leli lithi ikhomishini yeZimbabwe Electoral Commission yephule umthetho ngokuqhuba ukhetho lweposo olwe-postal voting ezinkambeni njalo lokudinda amaphepha okuvota ingazisanga abancintisa kukhetho lolu.
Umgcinisihlalo weZEC, uNkosikazi Priscilla Chigumba, utshele intathelizindaba izolo eHarare ukuba kuliqiniso ukuthi sebevota ezinkambeni labo abazahanjiswa endaweni ezitshiyeneyo eZimbabwe ngeviki ezayo kuqhutshwa ukhetho olukhulu.
Uthi amabandla wonke kawavunyelwa ukuhlola ukhetho lolu ezinkambeni zamapholisa lamasotsha. Kodwa ibandla leCCC, elikhokhelwa nguMnu. Nelson Chamisa, lithi konke lokhu akukho emthethweni.
Lithi ibandla elibusayo lesaba ukuba amapholisa alakho ukuvotela amabandla aphikisayo njengalokhu okwenzakala ngomnyaka ka2018 eHarare lapho avotela uMnu. Tendai Biti owayekumanyano weMDC Alliance, owanqoba uMnu. Terrance Mukupe, owebandla leZANU PF.
UNkosazana Nonhlanhla Mlotshwa, okubandla leCCC, uthi iZanu PF ingeke yanqoba kukhetho olukhululekileyo ngakho-ke sebesebenzisa amaqhinga wonke okuthi lingasuswa embusweni.
Kodwa uMnu. Joseph Tshuma, okudale leZanu PF Central Committee, uthi limatasatasa ibandla leCCC ngesikhathi kulungiselelwa ukhetho olukhulu oluzayo.
UTshuma uthi akumangalisi ukuvota kwabakubutho lamapholisa ngoba kwenziwa ngendlela efanayo sonke isikhathi.
SEE ALSO:
Ingxoxo Esiyenze loNkosazana Nonhlanhla Mlotshwa loMnu. Joseph Tshuma