UMkhokheli webandla eliphikisayo ele Citizens Coalition for Change (CCC), uMnu. Nelson Chamisa, uthi engavotelwa ukuthi angene embusweni ngeviki ezayo uthembisa abebutho ukuba uzathatha amanyathelo okuthi bephile impilo engcono kulalokho okukhona khathesi.
Amazwi ka Chamisa lawa uwatsho embuthanweni wokudinga usekelo lokuvotelwa kukhetho, emangweni weSeke esikolweni se Madamombe eMashonaland East ngosuku lokunanza lokuqakathekisa imisebenzi yabakubutho ele Defence Forces Day.
UChamisa uthe ibandla lakhe liyaqakathekisa ilanga lanamhlanje esithi kumele amasotsha aphile impilo engcono.
"Sifuna ukuba amasotsha ethu abe ngamabutho elizwe hatshi ebandla. Sifuna ukuba basebenzele ilizwe. Siqakathekisa amasotsha, amapholisa le nsoli zika hulumende. Kuhulumende wethu asifuni balwisane lamabandla aphikisayo."
UChamisa uthe uselungele ukungena embusweni ngeviki ezayo esithi indawo zonke asefike kizo abantu bafuna inguquko. Uphinde wasola kakhulu ukwaliswa kwabantu ukuya emihlanganweni yakhe.
Ekhuluma enkundleni ye National Sports Stadium e Harare lapho abe ehlangane lozulu we Zimbabwe ukuthakazelela ilanga le National Defences Forces Day uMongameli Emmerson Mnangagwa uthe uhulumende wakhe uyabenakekela abebutho.
Emhlanganweni wanamhlanje wabasekeli beCCC inengi laba belikhala ngokuthi baphilela evalweni ngoba bengavunyezwa ukwenza imihlangano.
Omunye walaba basekeli beCCC, nguMnu. Liberty Mugwagwa, othi akulula ukukhankasa bekhululekile kulumango.
"Kwesinye isikhathi siyazama ukwenza umsebenzi wethu ngokuthula. Sifisa ukuba ngabe uhulumende uyangenela ngoba kunzima indlela esiphila ngayo.”
Omunye njalo umsekeli we CCC uNkosikazi Tendai Chidyamhosi uthi bangathaba okwamagama nxa kungaba lenguquko yenkokheli engxenye kungaba lentuthuko ko Seke.
"Siyahlupheka ngoba siyalamba endlini. Akukho ukudla. Abantwana kabenelisi ukuya esikolo. Kwesinye isikhathi uyathola ukuthi lentandane kaziloba okokuziphilisa.”
Iyaqhubeka imikhankaso elizweni, ibandla eliphikisayo ele United Zimbabwe Alliance lalo lisenza imihlangano yemigwaqweni ama Road Shows ko Bulawayo.
Ibandla le ZANU PF namhlanje belingela mihlangano ngoba abasekeli babo bebathe gwaqa enkundleni eye National Sports Stadium benanza usuku lwabebutho ele Defences Forces Day, emkhosini okhokhelwe nguMongameli Mnangagwa.
Lanxa uMnangagwa ehlala ekhuthaza ukuthi abamabandla ezombusazwwe akhankasele ukuthola usekelo kukhetho ngokuthula, ingcwethi ezicubungula ezombusazwe kanye labamabandla aphikisayo bakhala ngokuthi, linkuthazo iphelela emlonyeni kungela manyathelo aqinileyo athathwa nguhulumende ukuvimba izehlakalo zodlakela loba ukujezisa labo abatshotshozela lokuphatheka kuloludlakela lwezombusazwe.